”პატრიოტთა ალიანსის” ერთ-ერთი ლიდერის ირმა ინაშვილის მტკიცებით, ყველა რეგიონში ,,თავის მაჟორიტარ დეპუტატს აგინებენ”.
ზუგდიდში, საკონსტიტუციო პროექტის საყოველთაო განხილვაზე მან აღნიშნა, რომ
მაჟორიტარი დეპუტატების საკითხი რაიონების მოსახლეობამ უნდა გადაწყვიტოს.
”მე გეუბნებით, სადაც ჩავდივარ, ყველა დედას აგინებს თავის დეპუტატს, არ ჩამოდიან, არ გვკითხულობენ, ხალხის პრობლემებით არ ინტერესდებიანო.
როცა თქვენ გვეუბნებით, აი ოპოზიციას გინდოდათ პროპორციულ სისტემაზე გადასვლა და მოგეცით, კი არ მოგვეცით, ეს ჩვენ მოვიპოვეთ ბრძოლით.
მისასალმებელია, რომ ამაზე წამოხვედით, მაგრამ რას გვეუბნებით? თან პროპორციულზე გადავალთ, მაჟორიტარულს გავაუქმებთ, მაგრამ მთელ გადასანაწილებელ ხმებს ჩვენ ავიღებთო”,- მიმართა ინაშვილმა უმრავლესობის წევრებს.
დეპუტატი ასევე შეეხო საარჩევნო ბლოკების საკითხს და „ქართული ოცნებას” წარსული გაახსენა.
„როცა თქვენ გვეუბნებით, რომ ბლოკების შექმნა ნეგატიური მოვლენაა, მგონი, „ქართული ოცნებაც“ ხელისუფლებაში ბლოკური სისტემით მოვიდა. გუშინ, არჩილ თალაკვაძემ პარტიები გაიხსენა, რომლებიც კოლოსალურ დაფინანსებას იღებდნენ. თქვენ არ იყავით, რომელმაც ნულ პროცენტიანი თუ მინუს ერთპროცენტიანი „რესპუბლიკური პარტია“ ხელისუფლებაშიც მოიყვანეთ და თავზეც დაგვასვით?“, - მიმართა უმრავლესობას ინაშვილმა.
ირმა ინაშვილის რეპლიკამ პარლამენტის თავმჯდომარე ირაკლი კობახიძემ გაამხიარულა, რაც ჟესტით გამოხატა.
