წლევანდელ სეზონზე აჭარაში 105 ათას ტონა ციტრუსის მოსავალს ელოდებიან, საიდანაც მანდარინი 100 ათასი ტონა, ფორთოხალი 4.4 ათასი ტონა, ლიმონი 0.6 ათასი ტონა იქნება.
როგორც სააგენტო "ჯი-ეიჩ-ენს" აჭარის სოფლის მეურნეობის სამინისტროდან აცნობეს, მოსავლის საერთო რაოდენობიდან, 15-20 ათასი ტონა არასტანდარტული ნაყოფი იქნება, რომლსაც შპს ,,ხილის კომპანია ნარინჯ"-ში, შპს ,,დორუქ ნათ ენდ ფუდ კომპანი"-ში და შპს ,,ციტრო" გადაამუშავებს.
იმავდროულად ციტრუსის გადამამუშავებელი საწარმოების მიერ შესყიდულ ყოველ კილოგრამ არასტანდარტულ ციტრუსზე, ჩამბარებელი ფიზიკური პირები სახელმწიფოსაგან დამატებით 10 თეთრს მიიღებენ.
სამინისტროს გათვლებით წლევანდელ სეზონზე 85 ათას ტონა სტანდარტული ციტრუსი იქნება, აქედან 75 ათასი ტონამდე საექსპორტო ბაზრებზე, ხოლო 10 ათასი ტონა ციტრუსის რეალიზაცია ადგილობრივ ბაზარზე მოხდება, საიდანაც 6 ათასი ტონა ნოემბერ-დეკემბერში, ხოლო 4 ათას ტონამდე ახალი წლის შემდეგ გაიყიდება.
ქართული ციტრუსის ძირითად საექსპორტო ქვეყანას კვლავ უკრაინა წარმოადგენს, სადაც მიმდინარე წლის სეზონზე 50 ათას ტონამდე ციტრუსი გადაიზიდება. ციტრუსი გადაიტვირთება ასევე სომხეთში, აზერბაიჯანში, ბელარუსში, მოლდავეთში, ყაზახეთში და უზბეკეთში.
აჭარის სოფლის მეურნეობის სამინისტროს მიერ ჩატარებული მონიტორინგის შედეგებით, რეგიონში 20 ათასი ტონა ციტრუსის დასაფასოებელი ხის ყუთის მარაგია. "მიზანშეწონილად მიგვაჩნია, რომ მიმდინარე წელს სარეალიზაციო-საექსპორტო ბაზარზე კონკურენტუნარიანობის გაზრდის მიზნით ციტრუსის დაფასოება განხორციელდეს პლასტმასის ტარაშიც"- აცხადებენ აჭარის სოფლის მეურნეობის სამინისტროში.
