თბილისის საქალაქო სასამართლოს სისხლის სამართლის საქმეთა კოლეგიამ ოჯახური დანაშაულისათვის ბრალდებული დ.ხ.-ს მიმართ გამამტყუნებელი განაჩენი დაადგინა. მოსამართლემ ბრალდებულს 4 წლითა და 6 თვით თავისუფლების აღკვეთა მიუსაჯა.
საქალაქო სასამართლოს ინფორმაციით, დ. ხ.-ს ბრალად ედებოდა ჯანმრთელობის განზრახ მძიმე დაზიანება.
„საქმის მასალების თანახმად, თბილისში, საცხოვრებელი კორპუსის ერთ-ერთ ბინაში, ბრალდებულმა, ურთიერთშელაპარაკების ნიადაგზე, ბლაგვი საგნის გამოყენებით სახისა და თავის არეში რამდენიმე დარტყმა მიაყენა დედას, რის შედეგადაც, ქალბატონმა უმძიმესი დაზიანებები მიიღო, კერძოდ, ქალა-ტვინის მძიმე ტრავმა, თავის ტვინის დაჟეჟილობა, სახის ძვლების მოტეხილობა, თავის ტვინის შეშუპება, მწვავე ჰემატომა შუბლის არეში და გულმკერდის დახურული ტრავმა.
ბრალდებულმა წარდგენილ ბრალდებაში თავი არ ცნო დამნაშავედ და საქმის არსებითი განხილვის სასამართლო სხდომაზე განმარტა, რომ ხსენებული დანაშაული ძლიერი სულიერი აღელვების მდგომარეობაში ჩაიდინა, რაც გამოწვეული იყო ალკოჰოლური თრობის ქვეშ მყოფი დედის არაადეკვატური ქცევით. სასამართლომ, მხარეთა მონაწილეობით გამოკვლეულ მტკიცებულებათა საფუძველზე, დ.ხ. დამნაშავედ ცნო მის მიმართ ბრალად შერაცხული დანაშაულის ჩადენაში“, - აღნიშნულია სასამართლოს განცხადებაში.
სასამართლოს განაჩენი შეიძლება გასაჩივრდეს თბილისის სააპელაციო სასამართლოს სისხლის სამართლის საქმეთა პალატაში, გამოცხადებიდან ერთი თვის ვადაში, თბილისის საქალაქო სასამართლოს სისხლის სამართლის საქმეთა კოლეგიის მეშვეობით.
