თბილისის საქალაქო სასამართლოს ის ნაწილი, სადაც მოწმეთა დაკითხვა მოხდება საზეიმოდ გაიხსნა.
საქართველოს უზენაესი სასამართლოსა და იუსტიციის უმაღლესი საბჭოს თავმჯდომარე, ნინო გვენეტაძემ მოწვეულ სტუმრებს ბულაჩაურის ქუჩაზე მდებარე საქალაქო სასამართლოს შენობა დაათვალიერებინა.
მისი განცხადებით, სასამართლო ახალი წესის ამოქმედებისთვის მთელი საქართველოს მასშტაბით არის მზად.
"ეს არის თბილისის საქალაქო სასამართლოს შენობა, სადაც მოხდება გამოძიებისა და დაცვის მიერ შემოტანილი შუამდგომლობების საფუძველზე მოწმის დაკითხვა მოსამართლის ზედამხედველობისა და მეთვალყურეობის ქვეშ. დაკითხვას უშუალოდ მხარე განახორციელებს, რომელმაც მოწმის დაკითხვა იშუამდგომლა. პროცესს კი ხელმძღვანელობას მოსამართლე გაუწევს.
დაკითხვა დახურულ რეჟიმში იქნება. ეს ძირითადად მოწმეთა ის კატეგორია იქნება, რომლებიც გამოკითხვაზე უარს ეტყვიან როგორც დაცვის, ისე ბრალდების მხარეს.
სასამართლოში მოწმის დაკითხვის ფენომენი და ამ უფლებების მაღალ გარანტიაში წარმოდგენა აძლევს დასაკითხ პირს იმის გარანტიას, რომ ის იქნება დაცული. დაკითხვის დროს არ იქნება მის მიმართ მუქარა, შანტაჟი და გამოძალვა ჩვენების მიცემის დროს", - განმარტა გვენეტაძემ.
გახსნის ცერემონიას იუსტიციის უმაღლესი საბჭოს წევრები, იუსტიციის სამინისტროს წარმომადგენლები და პარლამენტის იურიდიულ საკითხთა კომიტეტის თავმჯდომარე ვახტანგ ხმალაძე ესწრებოდნენ.
მოწმეთა დაკითხვის ახალი წესი 20 თებერვლიდან შევიდა ძალაში.
