იუსტიციის მინისტრი აცხადებს, რომ წარსულ საქმეებთან დაკავშირებით მას აზრი არ შეუცვლია, თუმცა მისი თქმით, იუსტიციის სამინისტროს აქვს პასუხისმგებლობა, იაროს მომავლისკენ მოსამართლეთა კორპუსთან ერთად.
"მომავალში მე არ მინდა განმეორდეს მსგავსი საქმეები. არ მინდა მინისტრის ცვლილებით ისევ მოხვდეთ ისეთ სიტუაციაში, როცა არ იქნებით დამოუკიდებელი. ჩვენ გვჭირდება არა კარგი მინისტრი, რომელიც არ გააკონტროლებს სასამართლოს, არამედ ინსტიტუციურად გამყარებული მოსამართლე", - განაცხადა თეა წულუკიანმა.
იუსტიციის უმაღლესი საბჭოს მიერ ორგანიზებულ კონფერენციაზე "სასამართლო დამოუკიდებლობის მიმდინარე გამოწვევები" შეკრებილ მოსამართლეებს მინისტრმა რეფორმის მესამე ტალღის მხარდაჭერისკენ მოუწოდა, თუმცა აქვე აღნიშნა, რომ რეფორმა მათი მხარდაჭერის გარეშეც გაგრძელდება.
"რეფორმის მესამე ტალღა ლოგიკურ დასასრულამდე უნდა მივიდეს და გახდეს კანონი. უკან ნაბიჯი და ამ რეფორმის გატანა პარლამენტიდან არ მოხდება, ამიტომაც მაინტერესებს რას ფიქრობთ რეფორმით გათვალისწინებულ საქმეთა ელექტრონული განაწილების პრინციპებთან დაკავშირებით. იმასთან დაკავშირებით, რომ ჩვენ გავაუმჯობესოთ მოსამართლეთა შერჩევის წესები, გავაძლიეროთ ინდივიდუალური მოსამართლეები ისე, რომ სასამართლოები არ იყოს ერთი კაცის მიერ მართული სამინისტროებივით", - განაცხადა თეა წულუკიანმა.
