საქალაქო სასამართლოს თავმჯდომარე მამუკა ახვლედიანი აცხადებს, რომ იუსტიციის უმაღლესი საბჭო და უზენაესი სასამართლოს თავმჯდომარე ,,უნდა წავიდეს“.
წლის შემაჯამებელ პრესკონფერენციაზე მან განაცხადა, რომ გაუგებარია დანიშვნების ის წესი, რომლითაც საბჭო მოსამართლეებს ნიშნავს. მისივე თქმით, უჭირს კომუნიკაცია ნინო გვენეტაძესთან.
მამუკა ახვლედიანი არ გამორიცხავს, რომ საჩივარი მოამზადოს იუსტიციის უმაღლესი საბჭოს წინააღმდეგ, რაც მოსამართლეების შეურაცხყოფას უკავშირდება.
"ვერ ვხედავ ვერანაირ განვითარებას იუსტიციის უმაღლესი საბჭოსა და უზენაესი სასამართლოს მოქმედი თავმჯდომარის პირობებში. საბჭოც და უზენაესი სასამართლოს თავმჯდომარეც უნდა წავიდეს", - განაცხადა მამუკა ახვლედიანმა.
მისივე თქმით, შერჩეულმა საბჭომ და მოსამართლეების არასწორად დანიშვნებმა არაერთი პრობლემა გააჩინა, რომელიც უახლოეს პერიოდში უნდა გამოსწორდეს, წინააღმდეგ შემთხვევაში, 20-25 წლის განმავლობაში ქვეყანას ექნება გამოუსწორებელი დამღა.
