სახელმწიფო სამხედრო სამეცნიერო-ტექნიკურ ცენტრ „დელტას“ გენერალური დირექტორის უჩა ძოძუაშვილის განცხადებით, გასული სამი დღის განმავლობაში, კახეთის რეგიონში სეტყვასაშიში პროცესების ინტენსიურობას სტიქიური სახე ჰქონდა. სეტყვასაშიში ღრუბლების საერთო ფართობმა 6500 კმ2-ს გადააჭარბა, რაც სისტემის სამუშაო ტერიტორიის ნახევარზე მეტია.
ამ დროის განმავლობაში, მთელი სისტემა და მართვის ცენტრი შესაბამის სამსახურებთან მჭიდრო კოორდინაციით, საჰაერო სივრცეში ფრენების უსაფრთხოების მაქსიმალური დაცულობით, 24 საათიან რეჟიმში მუშაობდა. გასროლილი იქნა 300 ზე მეტი რაკეტა, რამაც სტიქიის შემსუბუქების თვალსაზრისით ძალიან დიდი შედეგი მოიტანა. ის საკმაოდ დიდი ზარალი რომელიც სეტყვის და ქარის ტანდემისგან იყო მოსალოდნელი, მაქსიმალურად თავიდან იქნა აცილებული.
მოარული ხმები თითქოსდა საქართველოს სხვადასხვა რეგიონებში მოსული უხვი ნალექი დაკავშირებულია კახეთში სეტყვის საწინააღმდეგო სისტემის ამუშავებასთან, ძირეულად მცდარია. სისტემის მუშაოების სპეციფიკიდან და პრინციპიდან გამომდინარე მსგავსი კავშირი გამორიცხულია. სეტყვის საწინააღმდეგო სისტემის მუშაოების შედეგად, ღრუბელში არსებული ნალექის ადგილზე ჩამოწვიმება ხდება და არა ღრუბლის მასების ერთი ტერიტორიიდან მეორეზე გადადევნა.
რაც შეეხება მსგავსი სისტემის საქართველოს სხვა რეგიონებში დამონტაჟებას, შეიძლება ითქვას რომ ამ ეტაპზე საქართველოს სრული ტერიტორია შესწავლის პროცესშია.
სისტემის მოსაწყობად საჭიროა მთელი რიგი წინასწარი სამუშაოების და კვლევების წარმოება. სამუშაოების დასრულებისთანავე სსსტც „დელტა“ მზად იქნება მსგავსი სისტემის სხვა რეგიონებში მოწყობისათვის.
თავად სეტყვის საწინააღმდეგო სისტემა ისევე როგორც კვლევითი თეორიული მასალა და სეტყვასაშიშ ნალექებზე აქტიური ზემოქმედების პრინციპები მთლიანად საქართველოშია შემუშავებული.
სსსტც „დელტაშია“ დაპროექტებული და დამზადებული დღეს მომუშავე სისტემის მექანიკური და ელექტრონული ნაწილი. ზაფხულის ბოლომდე კი დაგეგმილია თავად სეტყვასაწინააღმდეგო რაკეტების წარმოების საქართველოში დაწყება.
