ჩოხოსან რაინდთა დასის დარბაზის მეთაური, პროფესორი გოგი დოლიძე სასამართლოს გადაწყვეტილებას აპროტესტებს, რომლის თანახმადაც, არ გაუქმდა თბილისის საკრებულოს გადაწყვეტილება - ქაქუცა ჩოლოყაშვილის ქუჩისთვის სახელის შეცვლასთან დაკავშირებით.
მისი ინფორმაციით, აღნიშნული გადაწყვეტილება 27 მაისს, თბილისის საქალაქო სასამართლომ (მოსამართლე – ნანა დარასელია) მიიღო, თუმცა მას სააპელაციო სასამართლოში გაასაჩივრებენ. გადაწყვეტილებას გოგი დოლიძე სამარცხვინოს უწოდებს და საკრებულოს დეპუტატს ზურაბ ნეფარიძეს თაღლითობაში ადანაშაულებს.
,,დედაქალაქის რუკიდან გაქრა საქართველოს ეროვნული გმირის – ქაქუცა ჩოლოყაშვილის სახელობის ქუჩა. ჩვენი დასი ვერ იკადრებს წინასწარ, სანამ ეს განაჩენი ოფიციალურად არ მოგვივა, რაიმე კატეგორიული განცხადება გააკეთოს, მაგრამ ერთს კი ვიტყვით: ძალიან სამარცხვინოა, რომ მთავრობისაგან ასე ქებული სასამართლო აჰყვა თბილისის საკრებულოს თაღლითი დეპუტატის ზურაბ ნეფარიძის ავანტიურას და ასეთი განაჩენი გამოიტანა. ზ. ნეფარიძე იმასაც კი არ მოერიდა, რომ თავის ბინძურ საქმეში მე–3 კლასის მოსწავლეებიც ჩაეთრია, ასევე გააყალბა ხელმოწერები (ამას მოწმობს თვით საკრებულოს მიერ სასამართლოში და ჩვენთვის ერთდროულად გადმოგზავნილი დოკუმენტები). ცნობილია ამ პიროვნების შესახებ მასმედიაშიც გავრცელებული ინფორმაცია – იგი თაღლითობისთვის არის ნასამართლები და ახლაც უჩივიან თაღლითობაზე. ასე, რომ სხვა გზა აღარ დაგვიტოვეს, დაველოდებით ამ განაჩენის ოფიციალურ ტექსტს, ამის შემდეგ გავაკეთებთ სათანადო განცხადებას. ცხადია, ჩვენ სააპელაციოშიც გავასაჩივრებთ. ვაი, საბრალო საქართველოვ! ამისთვის გადმოვასვენეთ ჩვენი ლეგენდარული გმირის ნეშტი საფრანგეთიდან, რომ ზ. ნეფარიძის მსგავსი თაღლითებისა და ავანტიურისტების აბუჩად ასაგდები გამხდარიყო?! მაგრამ ეს დროებითი ზეიმია ბოროტებისა”, - აცხადებს საქართველოს ეროვნული გმირის - ქაქუცა ჩოლოყაშვილის სახელობის სრულიად საქართველოს ჩოხოსან რაინდთა დასის დარბაზის მეთაური, აკაკი წერეთლის პრემიის ლაურეატი, პროფ. გოგი დოლიძე.
