იმერეთში არის დიდი პოტენციალი განვითარდეს მევენახეობა-მეღვინეობა, მემწვანილეობა, მებოსტნეობა, მეცხოველეობა, მეფუტკრეობა, სასათბურე მეურნეობა, სამაცივრე მეურნეობა, რძის, ხილის გადამმუშავებელი მრეწველობა, მეფრინველეობა, თხილის წარმოება, მარცვლეულის წარმოება, ჩირის, დაფნის, აბრეშუმის, ბაღჩეული კულტურის წარმოება. როგორც პრემიერ-მინისტრმა ირაკლი ღარიბაშვოლმა ქუთაისში „ძლიერი რეგიონი - ძლიერი საქართველოსთვის“ პრეზენტაციისას განმარტა, ხონში არის მეაბრეშუმების განვითარების რესურსი, სამტრედიაში კი სიმინდის წარმოების დიდი პოტენციალი, ზესტაფონში კი არის ტბორის თევზის წარმოების, ბოსტნეულისა და სოკოს სასათბურე მეურნეობების განვითარების პერსპექტივა.
„რაც შეეხება წარმოების განვითარებას, - ჭიათურას აქვს მარგანეცისა და კვარცის ქვიშის მოპოვების, მარმარილოს წარმოების, ბროლისა და მინის წარმოების, ხილის გადამუშავების განვითარების რესურსი; ბაღდათში არის ქართული ყურძნის ჯიშების წარმოების განვითარების პერსპექტივა; ვანს აქვს ხეტყის გადამუშავების, სამშენებლო წარმოების, ავეჯის წარმოების, სამკერვალო წარმოების, კვების მრეწველობის განვითარების პოტენციალი; ზესტაფონში არის ღვინის წარმოების, ცეცხლგამძლე აგურის წარმოების, საკონსერვო წარმოების რესურსი; თერჯოლას აქვს რესურსი ბეტონის კონსტრუქციების წარმოებისათვის; საჩხერეს - სამთომოპოვებითი მრეწველობის, კერამიკული თიხის წარმოების განვითარების რესურსი; ხარაგაულს - ხეტყის გადამუშავების, ავეჯის წარმოების, მარმარილოს გადამუშავების რესურსი; ხონს აქვს რესურსი აგურისა და კრამიტის წარმოებისათვის“, - აღნიშნა ღარიბაშვილმა.
