სამეგრელო-ზემო სვანეთის შესწავლის შედეგად რეგიონის განვითარებისთვის 3 ძირითადი მიმართულება გამოიკვეთა. პრემიერ-მინისტრმა ანაკლიაში ბიზნესმენებთან შეხვედრისას აღნიშნული მიმართულებებიც ჩამოთვალა: სოფლის მეურნეობა, სატრანსპორტო-ლოგისტიკური განვითარება შესაბამისი მომსახურებით და ტურიზმი.
”სამეგრელო-ზემო სვანეთის რეგიონს აქვს განვითარების ძალიან დიდი პოტენციალი. მინდა გითხრათ, რომ მთავრობის ეკონომიკურმა საბჭომ სრულად შეისწავლა ამ რეგიონის შესაძლებლობები - ბუნებრივი რესურსები, ეკონომიკური პოტენციალი, ადამიანური რესურსები. ჩვენ გვაქვს სრული სურათი, თუ რა არის საჭირო რეგიონის ფეხზე დასაყენებლად და უკვე გვაქვს შესაბამისი სამოქმედო გეგმა.
სამეგრელო-ზემო სვანეთის შესწავლის შედეგად რეგიონის განვითარებისთვის გამოიკვეთა 3 ძირითადი მიმართულება.
დავიწყებ სოფლის მეურნეობით. რეგიონში არსებობს ძალიან კარგი რესურსი თხილის მოყვანა-გადამუშავებისთვის, რძისა და ხორცის გადამუშავებისთვის, ჩაის წარმოებისთვის, ხილის წარმოება-გადამუშავებისთვის, საკონსერვო წარმოებისთვის, მეცხოველეობის, მეფრინველეობის, მეფუტკრეობის განვითარებისთვის, ეთერზეთების წარმოებისთვის, სანერგე და სასათბურე მეურნეობების განვითარებისთვის, ხურმის ჩირის დამზადებისთვის, მარცვლეულისა და სოიოს კვების პროდუქტების გადამუშავებისთვის.
აქვე ვიტყვი, რომ რეგიონში ასევე არსებობს ძალიან კარგი რესურსი წარმოების განვითარებისთვის. კერძოდ, ზუგდიდში არსებობს რესურსი ავეჯის გადამუშავებისათვის, ხის სამშენებლო მასალების, კონსტრუქციებისა და ნაკეთობების წარმოებისათვის, უალკოჰოლო სასმელებისა და ლუდის წარმოებისათვის, სამშენებლო მასალების წარმოებისათვის; მარტვილში პერსპექტიულია საშრობი მეურნეობების განვითარება, სენაკში - ცემენტისა და აგურის წარმოება, ხობში -თაბაშირ-მუყაოს გადამუშავება, თხილის გადამუშავება, სიმინდის ზეთის გადამუშავება.
სამეგრელო-ზემო სვანეთს აქვსისეთი ბუნებრივი რესურსების მარაგი, როგორიცაა: სააგურე თიხა, კირქვა, ქვიშა-ხრეში, მარმარილო, ანდეზიტი, ბაზალტი, ტრავერტინი, დოლომიტი, ასევე სასმელი და მინერალური წყალი. და, რა თქმა უნდა,ასეთი სიმდიდრის მქონე რეგიონი ეკონომიკურად უნდა გაძლიერდეს. ჩვენ ეს რესურსი მაქსიმალურად უნდა ავითვისოთ.
სამეგრელო-ზემო სვანეთი არის ისტორიულ-კულტურული მემკვიდრეობით მდიდარი და გეოგრაფიული ლანდშაფტით გამორჩეული რეგიონი. ჩვენ ამ მიმართულებითაც აქტიურად უნდა ვიმუშაოთ და ის დიდი პოტენციალი, რომელიც სამეგრელოს ტურიზმისთვის აქვს, დაუშვებელია, რომ მთლიანად არ გამოვიყენოთ. მე მაქვს დიდი იმედი, რომ საერთო ძალისხმევით ამ ულამაზეს რეგიონს სრულიად სხვა მიმზიდველობას შევძენთ და ტურიზმის განვითარების კუთხით იგი ერთ-ერთი გამორჩეული გახდება”, აღნიშნა პრემიერ-მინისტრმა ბიზნესმენებთან შეხვედრისას.
პრემიერ-მინისტრმა იმედი გამოთქვა ასევე, რომ სამეგრელო-ზემო სვანეთში საინტერესო ბიზნესპროექტები განხორციელდება.
”დღეისათვის ამ რეგიონში მიმდინარე საინვესტიციო პროექტების ჯამური ღირებულება 224 მილიონ ლარს აჭარბებს. მხოლოდ ფოთში 25 მილიონ დოლარზე მეტი ღირებულების პროექტები ხორციელდება;6 მილიონი ლარის ინვესტიციაა ჩადებული ხობში; წალენჯიხაში ინვესტიციის ოდენობა 2 მილიონ დოლარზე მეტია, მესტიაში კი შემოსულია 1 მილიონი დოლარის ინვესტიცია.
ჩვენი მთავრობის პოლიტიკამ, ბიზნესის ხელშეწყობამ, თანამიმდევრულმა ნაბიჯებმა განაპირობა ინვესტიციების ზრდის ტენდენცია რეგიონში. მე მინდა მოვუწოდო ჩვენს ბიზნესმენებს, რომ დაინეტერესდნენამ შესანიშნავი მხარით და აქ განახორციელონმათთვის საინტერესო ბიზნესპროექტები”, განაცხადა ირაკლი ღარიბაშვილმა.
