საბიუჯეტო კოდექსის პროექტში ფინანსთა სამინისტროს მიერ გათვალისწინებული შენიშვნები, დღეს ფინანსთა მინისტრმა ნოდარ ხადურმა და სახაზინო სამსახურის ხელმძღვანელმა ცოტნე ყავლაშვილმა სახელმწიფო უნივერსიტეტების რექტორებსა და ადმინისტრაციის უფროსებს პირადად გააცნეს.
როგორც შეხვედრაზე აღინიშნა, ფინანსთა სამინისტრომ გაითვალისწინა პარლამენტში გამოთქმული შენიშვნები და სსიპ-ებს, ა(ა)იპ-ებს, ადგილობრივ თვითმმართველობებს და ავტონომიურ რესპუბლიკებს უფლება ექნებათ დამატებითი შემოსავლების მიღების მიზნით იქონიონ ანგარიშები კომერციულ ბანკებში, რომელზეც საკუთარი გადაწყვეტილებისებრ გადაიტანენ ხაზინაში აკუმულირებულ ჭარბ ფულს. ამ ანგარიშებზე დარიცხული პროცენტები იქნება მათი შემოსავალი და ისინი ამ თანხას საკუთარი გადაწყვეტილების შესაბამისად განკარგავენ.
შეხვედრაზე კიდევ ერთხელ ხაზგასმით აღინიშნა, რომ პროექტში შესული ცვლილებების გათვალისწინებით აღნიშნული საბიუჯეტო რეფორმა არ შეზღუდავს უნივერსიტეტების ფინანსურ დამოუკიდებლობას და არ შექმნის დამატებით ბიუროკრატიას როგორც უმაღლესი დაწესებულებებისთვის, ისე სტუდენტებისთვის.
როგორც ფინანსთა მინისტრმა აღნიშნა, ფინანსთა სამინისტრო მზადაა სამინისტროს აკადემიის ბაზაზე ხაზინის ერთიანი ანგარიშის სისტემის უკეთ გამოყენების კუთხით მოხდეს უნივერსიტეტების ფინანსური მენეჯერების გადამზადება.
შეხვედრაზე უნივერსიტეტების წარმომადგენლებმა დასვეს შეკითხვები, რაზეც სამინისტროს მხრიდან დეტალურად გაეცა პასუხები.
მიღებული გადაწყვეტილებით, შეიქმნება სამუშაო ჯგუფი, სადაც უმაღლესი სასწავლებლების წარმომადგენლები სახაზინო სამსახურის თანამშრომლებთან ერთად გაივლიან ტექნიკურ დეტალებს, რათა კანონში ცვლილებების შეტანის შემდეგ, უნივერსიტეტები მომზადებულები შეხვდნენ რეფორმას.
