დარიალის ხეობაში დღეს სეისმოლოგთა ჯგუფს ელოდებიან. სპეციალისტები არსებულ ვითარებას ადგილზე დააკვირდებიან და შეისწავლიან.
ჯგუფი ყაზბეგის ბაზაზე განთავსდება. ისინი სეისმურ სადგურებს მოაწყობენ და დაკვირვების წერტილების რაოდენობას გაზრდიან. ჯგუფი 9 წევრისგან შედგება და მასში გეოლოგები, გეოფიზიკოსები და სეისმოლოგები შედიან.
სტიქიის ადგილზე სამძებრო-სამაშველო სამუშაოები დილიდან განახლდა. დაღუპულების შესახებ ინფორმაცია ამ დრომდე არ ვრცელდება. დაუზუსტებელი მონაცემებით, სტიქიური უბედურებისას 7 ადამიანია დაკარგული. რამდნიმედღიანი ძებნის შემდეგ ნაპოვნია მეწყერის ქვეშ მოყოლილი ერთ-ერთი სატვირთო მანქანის ნაწილები.
მყინვარწვერზე მეწყერსაშიში ზონა ისევ არსებობს, რის გამოც ხეობაში გადაადგილება აკრძალულია, ჩაკეტილია ლარსის სასაზღვრო-გამშვები პუნქტიც.
მყინვარზე მესაზღვრეებისა და ალპინისტების ჯგუფებია მობილიზებული, რომლებიც მეწყერის დაძვრის შემთხვევაში საგანგებო შტაბს ინფორმაციას მიაწვდიან. ადგილზე მიმდინარე სამუშაოებს შინაგან საქმეთა და ინფრასტრუქტურის მინისტრები პირადად აკვირდებიან. მეწყერი დარიალის ხეობაში შაბათს დილით ჩამოწვა.