საქართველოს კულტურული მემკვიდრეობის დაცვის ეროვნული სააგენტოს მიერ საყდრისთან დაკავშირებით მოწვეული ექსპერტების მიერ დაწერილი პირველადი დასკვნა დღის განმავლობაში გახდება ცნობილი.
აღნიშნულის თაობაზე საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა, ნიკა ანთიძემ დღევანდელ პრესკონფერენციაზე განაცხადა და აღნიშნა, რომ ექსპერტებს ორი დასკვნის გაკეთების ვალდებულება აქვთ.
მისი თქმით, პირველი დასკვნა საქართველოში ყოფნისას უნდა გააკეთონ, ხოლო მეორე - 19 მაისს თავის ქვეყანაში დაბრუნების შემდეგ.
"კიდევ ერთხელ გავიმეორებ, რომ აქ ფიზიკური კვლევა არ მიმდინარეობდა. მიმდინარეობდა დოკუმენტაციის კვლევა, აზრთა გამოკითხვა მეცნიერებში, ადგილზე დათვალიერება, ამიტომ კვლევის იმ ნაწილზე ვსაუბრობ, რომელიც დოკუმენტაციის ნაწილს ეხება და არა არქეოლოგიურს," - აღნიშნა ნიკა ანთიძემ.
მისივე განცხადებით, მთლიან ანგარიშში ასახული იქნება რეკომენდაციები, თუ რა უნდა ჩატარდეს და რა უნდა განახორციელოს როგორც საგენტომ, ასევე კომპანია RMG-მ.
კულტურული მემკვიდრეობის დაცვის ეროვნული სააგენტოს მოწვევით, საქართველოში ჩამოსული ექსპერტები უკვე ერთი კვირაა მუშაობენ და ყველა იმ ჯგუფს ხვდებიან, ვისაც საყდრისის თემაზე უმუშავიათ.
