დღეს გამოსაშვები გამოცდისთვის მე-11 კლასელების რეგისტრაცია იწყება.
როგორც გამოცდების ეროვნული ცენტრის ხელმძღვანელმა მაია მიმინოშვილმა განაცხადა, გამოსაშვები გამოცდები ივნისში ჩატარდება, რადგან მე-11 კლასელები სწავლას 15 ივნისს დაასრულებენ.
მოსწავლეები გამოცდას ქიმიაში, ფიზიკაში, ბიოლოგიასა და გეოგრაფიაში ჩააბარებენ. საგამოცდო პერიოდი კი, 13 ივნისს დაიწყება.
„13 ივნისი მე-11 კლასელებისთვის სავარჯიშო დღეა, როდესაც მათ საშუალება ექნებათ, საგამოცდო პროგრამას გაეცნონ და გამოცდის ჩაბარებაში ივარჯიშონ. უშუალოდ პირველი გამოცდა კი მათ 14 ივნისს ჩაუტარდებათ. 15 ივნისი თვითმმართველობის არჩევნების დღეა, ამდენად ამ დღეს მოსწავლეები დაისვენებენ. საგამოცდო პროცესში ისინი 16, 17 და 18 ივნისს ჩაერთვებიან. 19 ივნისი მათთვის სარეზერვო დღეა და ამ დღეს საგამოცდო პროცესი დასრულდება" - განმარტა მიმინოშვილმა.
გამოცდებში მონაწილე მე-11 კლასელთა რაოდენობა უახლოეს დღეებში გაირკვევა.