ბულგარეთის ელჩმა პლამენ ბონჩევმა საქართველოს დიპლომატიისა და პოლიტიკის აკადემიის მსმენელებს უმასპინძლა და ოფიციალურად გამოუცხადა დიპლომატიური კორპუსის მხარდაჭერა, ბულგარეთის საელჩოშივე მოხდა აკადემია ოფიციალურად გახსნა. ცნობილი გახდა, რომ პლამენ ბონჩევი საქართველოს დიპლომატიისა და პოლიტიკის აკადემიის საპატიო დირექტორი გახდება და აკადემიის მსმენელებთან სამომავლოდაც განახორციელებს საერთო პროექტებს, თავის მხრივ აკადემია შეხვედრებს მომავალი კვირიდან საქართველოში აკრედიტებულ სხვადასხვა დიპლომატიური კორპუსის წარმომადგენლებთან განაგრძობს. ელჩმა ვრცლად ისაუბრა ბულგარეთისა და საქართველოს ურთიერთობებზე, ასევე შავი ზღვის რეგიონის გამოწვევების შესახებ.
გახსნის ცერემონიაზე, აკადემიის დამფუძნებელმა, თეონა ლავრელაშვილმა მადლობა გადაუხადა ელჩს მხარდაჭერისთვის და ისაუბრა დიპლომატიური აკადემიის მნიშვნელობაზე საქართველოსთვის, როგორც პატარა ქვეყნისთვის , რომელსაც არ აქვს დიდი დიპლომატიური გამოცდილება ისტორიული წარსულიდან გამომდინარე, რომლის მიზანიც ახალი თაობის პოლიტიკური და სამოქალაქო ლიდერების პროფესიული ზრდისთვის ხელის შეწყობა და ქართული სამართლებრივი სახელმწიფოს მშენებლობის პროცესში დიპლომატიის მნიშვნელობის გაზრდა იქნება.
ლავრელაშვილმა ასევე აღნიშნა, რომ საქართველოს და ბულგარეთს მეგობრობის მრავალწლიანი ისტორია აქვთ. ბულგარეთმა და საქართველომ მხოლოდ 90 -იან წლებში მოახერხა დემოკრატიზაციის პროცესების დაწყება და საბაზრო ეკონომიკაზე გადასვლა, თუმცა ბულგარეთი უკვე ნატოს და ევროკავშირის წევრი ქვეყანაა, შესაბამისად ბულგარეთის გამოცდილება ძალიან მნიშვნელოვანია საქართველოსთვის. ლავრელაშვილმა აღნიშნა, რომ ბულგარეთს და საქართველოს ძალიან წარმატებული სავაჭრო ურთიერთობები აქვთ და გამოთქვა სურვილი, რომ განათლების სფეროში დაიწყოს თანამშრომლობა და აკადემიამ ამ მხრივ დიდი როლი უნდა შეასრულოს, რადგან „არ არსებობს დემოკრატია განათლებული მოქალაქის გარეშე და არ არსებობს პროგრესი ცოდნის გარეშე".
მასალის გამოყენების პირობები