მთავრობამ, სამოქალაქო საზოგადოებასთან ერთად, დაიწყო მუშაობა ნარკოკანონმდებლობის რეფორმაზე,- ამის შესახებ საქართველოს პრემიერ-მინისტრმა ნარკოპოლიტიკის გლობალური კომისიის დელეგაციასთან შეხვედრის დროს განაცხადა.
მთავრობის მეთაურმა შეხვედრაზე ხაზგასმით აღნიშნა, რომ ეფექტური ანტინარკოტიკული მიდგომების შემუშავება საქართველოს ხელისუფლებისთვის პრიორიტეტია.
მისივე განმარტებით, ინფექციურ დაავადებებზე მკურნალობის ხელმისაწვდომობის კუთხით, უკვე გადაიდგა მნიშვნელოვანი ნაბიჯები. კერძოდ, მთავრობამ შეიმუშავა C ჰეპატიტის პროგრამა, რომელიც სასჯელაღსრულების სისტემაში უნივერსალურ ხელმისაწვდომობას უზრუნველყოფს, ხოლო სამოქალაქო სექტორში ფასს 60%-ით ამცირებს.
როგორც პრემიერმა შეხვედრისას განაცხადა, მთავრობის მიზანია, კიდევ უფრო გააფართოოს მკურნალობის, რეაბილიტაციის და ზიანის შემცირების პროგრამები და განაახლოს რეგულაციები თანამედროვე მოთხოვნების შესაბამისად.
ნარკოპოლიტიკის თემაზე მომუშავე საერთაშორისო საზოგადოების ინტერესი საქართველოს მიმართ განსაკუთრებთ მას შემდეგ გაიზარდა, რაც საქართველოს სასჯელაღსრულების სისტემაში 2013 წლიდან C ჰეპატიტის პროგრამა დაიწყო და სამოქალაქო სექტორში C ჰეპატიტის მკურნალობის ღირებულება 60%-ით გაიაფდა. ეს ნაბიჯი მთელმა მსოფლიომ C ჰეპატიტის მკურნალობის ფასის შესამცირებლად ინოვაციურ მიდგომად აღიარა.
ნარკოპოლიტიკის გლობალური კომისიის დელეგაციის შემადგენლობაში არიან შვეიცარიის ექსპრეზიდენტი რუთ დრეიფუსი, გლობალური ფონდის ყოფილი
პრეზიდენტი და გაერო-ს საგანგებო წარმომადგენელი მიშელ კაზაჩკინი, აშშ, სიეტლის პოლიციის ყოფილი დირექტორი ჯიმ კუგელი და ღია საზოგადოების ინსტიტუტის ერთ-ერთი დირექტორი დენიელ ვოლფი.
„მივესალმებით და დადებითად ვაფასებთ საქართველოში ნარკოპოლიტიკის მიმართულებით განხორციელებულ რეფორმებს. ჩვენ ვისაუბრეთ პრემიერთან, რომ აღნიშნული რეფორმები ორიენტირებულია თითოეული მოქალაქისა და მთლიანად საზოგადოების ჯანმრთელობაზე. რეპრესიული მიდგომის შემთხვევაში კი ადამიანები შეშინდებიან და დაიმალებიან, რაც ეპიდემიის საფრთხეს შექმნის, როგორც ქვეყანაში, ასევე რეგიონში,"-განაცხადა გაერო-ს საგანგებო წარმომადგენელმა მიშელ კაზაჩკინმა შეხვედრის დასრულების შემდეგ.
კომისიის წევრებთან შეხვედრას საქართველოს სასჯელაღსრულებისა და პრობაციის მინისტრის მოადგილე არჩილ თალაკვაძე დაესწრო.
მასალის გამოყენების პირობები