პარლამენტში ინიცირებული პროექტით უცხოეთში მცხოვრები თანამემამულის დეფინიცია იცვლება.
შესაბამისი ცვლილებები "უცხოეთში მცხოვრები თანამემამულეებისა და დიასპორული ორგანიზაციების შესახებ" კანონში შედის, რომელიც დიასპორისა და კავკასიის საკითხთა საპარლამენტო კომიტეტმა მოამზადა.
კერძოდ, ცვლილება გულისხმობს იმას, რომ სხვა სახელმწიფოში ხანგრძლივად მცხოვრები საქართველოს მოქალაქე, უცხოეთში მცხოვრები თანამემამულის სტატუსით ვეღარ ისარგებლებს. უცხოეთში მცხოვრებ თანამემამულედ მხოლოდ უცხო ქვეყნის ის მოქალაქე ჩაითვლება, რომელსაც აქვს წარმომავლობა საქართველოდან, ან რომლის მშობლური ენა ქართულ-კავკასიურ ენებს მიეკუთვნება.
მოქმედი კანონით, უცხოეთში მცხოვრები თანამემამულე არის საქართველოს მოქალაქე, რომელიც ხანგრძლივად ცხოვრობს სხვა სახელმწიფოში, ან სხვა სახელმწიფოს მოქალაქე, რომელსაც აქვს საქართველოდან წარმომავლობა, ან რომლის მშობლიური ენა მიეკუთვნება ქართველურ-კავკასიურ ენებს. აღნიშნული კანონი უცხოეთში მცხოვრები თანამემამულეებისთვის ითვალისწინებს გარკვეულ პრივილეგიებს სხვა უცხო ქვეყნის მოქალაქეებთან მიმართებაში.
დიასპორისა და კავკასიის საკითხთა საპარლამენტო კომიტეტის განმარტებით, არ არსებობს საჭიროება უცხოეთში მცხოვრები თანამემამულე უცხოეთში ხანგრძლივად მცხოვრები საქართველოს მოქალაქე იყოს, რადგან საქართველოს მოქალაქეს კონსტიტიციით და კანონმდებლობის შესაბამისად, მისი საცხოვრები ადგილის მიუხედავად, გაცილებით ფართო უფლებები აქვს.
