პატიმართა შეწყალების სახელმწიფო კომისიამ დადებითი რეკომენდაცია 100-მდე მსჯავრდებულზე გასცა.
კომისიის თავმჯდომარე ალექსანდრე ელისაშვილის ინფორმაციით, კომისიის წევრებმა რამდენიმე სამუშაო შეხვედრაზე და გამართულ სხდომებზე 500-მდე პატიმრის საქმე განიხილეს, ხოლო დადებითი რეკომენდაცია 100-მდე მსჯავრდებულზე გაიცა.
ამ მსაჯვრდებულების უმრავლესობას საპატიმროდან გათავისუფლების, ნაწილს კი სასჯელის შემცირების რეკომენდაცია მიეცა. შესაწყალებელ პირთა სიაში არიან როგორც მამაკაცები, ასევე ქალები და არასრულწლოვნები.
როგორც კომისიის თავმჯდომარე განმარტავს, ახალი დებულების საფუძველზე შეწყალება პირველად ხორციელდება.
შესაწყალებელ პირთა სია საქართველოს პრეზიდენტს, გიორგი მარგველაშვილს ხელმოსაწერად დღეს გადაეგზავნება. პრეზიდენტი დოკუმენტს ხელს უახლოეს დღეებში მოაწერს.
შეწყალებული მსჯავრდებულები საპატიმრო დაწესებულებებს სავარაუდოდ, აღდგომის ბრწყინვალე დღესასწაულზე, 20 აპრილს დატოვებენ.