13 აპრილს, 16:00 საათზე, მთავრობის კანცელარიის წინ გაიმართება აქცია "არა კოლაბორაციონიზმს! არა მტერთან თანამშომლობას!".
აქციის ორგანიზატორები არიან საზოგადოება "ივერია", და საზოგადოება "დაბრუნება", რომელთა განცხადებით, აქცია არ არის ორგანიზებული პოლიტიკური მოძრაობის მიერ, შესაბამისად არ აქვს მნიშვნელობა პოლიტიკურ სიმპათიებს, მნიშვნელოვანია მხოლოდ სახელმწიფოებრივი აზროვნება და განვითარებისკენ სწრაფვა.
ორანიზატორები საზოგადოებას მოუწოდებენ გაერთიანდნენ ერთი იდეის გარშემო - „არა კოლაბორაციონიზმს".
„ყველას, ვინც მიიჩნევთ, რომ რუსეთი ოკუპანტია, ყველას, ვინც ფიქრობთ, რომ ოკუპანტთან თანამშრომლობა დანაშაულია, ყველას, ვინც ირჩევს ევროპულ მომავალს, განვითარებასა და პროგრესს, ერთად ვუთხრათ არა კოლაბორაციონიზმს!", - აცხადებენ ორგანიზატორები.
ისინი მოუწოდებენ მთავრობას დაიცვან საქართველოს მოქალაქეების უფლებები.
„ერთად მოვუწოდოთ საქართველოს მთავრობას, დაიცვას საქართველოს მოქალაქეების უფლებები და რუსეთის ხელშემწყობთა წინააღმდეგ იმოქმედოს საქართველოს კონსტიტუციის მიერ მისთვის მინიჭებული უფლებების ფარგლებში", - აცხადებენ ორგანიზატორები.
