„ახალგაზრდა ადვოკატები" ინიციატივით მიმართავენ მთავრობას და საქართველოს პარლამენტს განახორციელონ ცვლილებები „ქ.თბილისში 1989 წლის 9 აპრილს საქართველოს დამოუკიდებლობის მოთხოვნით გამართული მშვიდობიანი აქციის დარბევის შედეგად დაზარალებულთა აღიარების და მათი სოციალური დაცვის გარანტიების შესახებ" საქართველოს კანონში. ამის შესახებ განცხადება, დღეს გამართულ ბრიფინგზე ორგანიზაციის იურისტებმა გააკეთეს.
ორგანიზაციის განცხადებით, 2006 წელს კანონში განხორციელებული ცვლილებების შედეგად ძალადაკარგულად გამოცხადდა 1989 წლის 9 აპრილს დაზარალებულთათვის განკუთვნილი კომპენსაციების უმეტესი ნაწილი , მათ შორის გაზის, დენის და სხვა შეღავათები კომუნალურ გადასახადებზე. ამასთან, სოციალური დახმარების შესახებ საქართველოს კანონით განისაზღვრა, რომ კომპენსაცია გაიცემა მხოლოდ 9 აპრილს დაღუპულთა ოჯახის წევრებზე. ადვოკატების განცხადებით, კანონში არაფერია ნათქვამი იმ პირების ოჯახის წევრებზე, რომლებმაც, ამ დარბევის შედეგად მთლიანად ან ნაწილობრივ დაკარგეს შრომისუნარიოანობა. გარდა ამისა, სოციალური დახმარების შესახებ საქართველოს კანონში აღნიშნულია, რომ 1989 წლის 9 აპრილს მშვიდობიანი აქციის დარბევის შედეგად დაზარალებული პირები იღებენ კომპენსაციას მხოლოდ იმ შემთხვევაში თუკი ისინი განეკუთვნებიან სპეციალური მზრუნველობის საჭიროების პირებს, ღატაკ ოჯახს ან უსახლკაროს.
არასამთავრობო ორგანიზაცია „ახალგაზრდა ადვოკატები" რეკომენდაციით მიმართავენ საქართველოს მთავრობასა და საკანონმდებლო ორგანოს, აღადგინონ კანონში ადრე არსებული სოციალური დახმარებები (დენის, გაზის და სხვა სახის კომუნალური გადასახადების შეღავათები), გარდა ამისა, გაეზარდოს სახელმწიფო პენსია, რომელიც დღევანდელი მდგომარობით 22 ლარს შეადგენს.ამასთან, ორგანიზაციის განცხადებით, კომპენსაცია უნდა გაიცეს არამარტო კანონის მიხედვით განსაზღვრული სოციალური სტატუსის პირებზე („სპეციალური მზრუნველობის საჭიროების მქონე პირი, „ღატაკი ოჯახი" ან „უსახლკარო"), არამედ ყველა იმ პირზე, რომელიც დარეგისტრირებულია შესაბამის ორგანოში 9 აპრილის დარბევის შედეგად დაზარალებულად.
ორგანიზაციის წარმომადგენლების განცხადებით, სარეკომენდაციო პაკეტი საქართველოს პარლამენტსა და მთავრობას უახლოეს დღეებში გაეგზავნებათ.