9 აპრილის მემორიალთან ღამით რამდენიმე ინციდენტი მოხდა. რუსთაველის გამზირზე შეკრებილთა გაღიზიანება იმ თაიგულმა გამოიწვია, რომლის არშიაც რუსული დროშის ფერებში იყო გადაწყვეტილი. მემორიალთან შეკრებილებმა არშია ჯერ ფეხით გათელეს, შემდეგ კი ცეცხლი წაუკიდეს და დაწვეს.
მემორიალთან სიტუაცია კიდევ ერთხელ მაშინ დაიძაბა, როდესაც რუსთაველის გამზირზე "ერთიანი ნაციონალური მოძრაობის" მერობის კანდიდატი ნიკა მელია მივიდა.
დაპირისპირება "ნაციონალური მოძრაობის", დედაქალაქის მერიის წარმომადგენლებსა და მემორიალთან მყოფ პოლიტპატიმრის სტატუსით გათავისუფლებულებს შორის სიტყვიერი შეურაცხყოფით დაიწყო.
26 მაისს დაზარალებულები და პოლიტპატიმრის სტატუსით გათავისუფლებულები მემორიალთან „ნაციონალური მოძრაობის" წევრების მისვლას აპროტესტებდნენ და აცხადებდნენ, რომ მათ 9 აპრილს დაღუპულები შეურაცხყვეს.
სიტუაციის განმუხტვა საპატრულო პოლიციამ შეძლო, რის შემდეგაც ნიკა მელიამ და მერიის თანამშრომლებმა მემორიალის გვირგვინით შემკობა შეძლეს.
შეგახსენებთ, რომ 25 წლის წინ, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს, რასაც მსხვერპლი მოჰყვა.
სადამსჯელო რაზმს გენერალი იგორ როდიონოვი ხელმძღვანელობდა. დარბევის შედეგად, 21 ადამიანი დაიღუპა და პარლამენტის წინ შეკრებილი ათასობით მოქალაქე დაუდგენელი შემადგენლობის გაზით მოიწამლა.
მრავალათასიანი აქციის მონაწილეების და მოშიმშილეების მთავარი მოთხოვნა საქართველოს საბჭოთა კავშირის შემადგენლობიდან გამოსვლა და დამოუკიდებლობის აღდგენა იყო.
ტრაგედიიდან ზუსტად 2 წლის შემდეგ, 1991 წლის 9 აპრილს კი უზენაესი საბჭოს თავმჯდომარე ზვიად გამსახურდიამ, რეფერენდუმის საფუძველზე, ეს თარიღი საქართველოს სახელმწიფოებრივი დამოუკიდებლობის აღდგენის დღედ გამოაცხადა.