5 აპრილს, 19:30 საათზე, საქართველოს კულტურისა და ძეგლთა დაცვის სამინისტროს მხარდაჭერით, თბილისის ვანო სარაჯიშვილის სახელობის დიდ საკონცერტო დარბაზში პროექტის "საქართველოს მომავლის ვარსკვლავები" ფარგლებში კლასიკური მუსიკის კონცერტი გაიმართება.
კონცერტში მონაწილეობას მიიღებენ განსაკუთრებული ნიჭით დაჯილდოებული ქართველი და აზერბაიჯანელი მოსწავლეები: თამარ ქორქაძე (ვიოლინო) (თბილისის, ე.მიქელაძის სახ. ცენტრალური სამუსიკო სასწავლებელი), მარიკა კუხიანიძე (ფორტეპიანო) (თბილისის, ზ.ფალიაშვილის სახ. ცენტრალური სამუსიკო სკოლა „ნიჭიერთა ათწლედი"), ლეილა ზეინალოვა (ფორტეპიანო) (ბაქოს, ბიულ-ბიულის სახ. სპეციალური სამუსიკო სკოლა), ჯამილა ასკერზადე (ვიოლინო) (ბაქოს, ბიულ-ბიულის სახ. სპეციალური სამუსიკო სკოლა).
კონცერტზე შესრულდება ე.შოსონის, პ. სარასატეს, შუბერტის, შოპენის, ლისტის, კარაევის, გ. ვენიავსკის, ა. ბიცინის, ა. გაშიმოვის და სხვა კომპოზიტორთა ნაწარმოებები.
კლასიკური მუსიკის კონცერტს საქართველოს კულტურისა და ძეგლთა დაცვის მინისტრის მოადგილე ბადრი ბარატიონ-გრუზინსკი, დიპლომატიური კორპუსის წარმომადგენლები და მიწვეული სტუმრები დაესწრებიან.
პროექტის "საქართველოს მომავლის ვარსკვლავები" მიზანია კლასიკური მუსიკის პოპულარიზაცია, ასევე საქართველოში და სხვადასხვა ქვეყანაში მცხოვრები განსაკუთრებულად ნიჭიერი ახალგაზრდა მუსიკოსების ერთობლივი მიღწევების წახალისება.
ამავე პროექტის ფარგლებში კლასიკური მუსიკის კონცერტი პირველად 2013 წელს ჩატარდა, სადაც მონაწილეობა მიიღეს ავსტრიაში მცხოვრებმა ქართველმა ნიჭიერმა ახალგაზრდამ ელისო გოგიბედაშვილმა (ვიოლინო) და ლიზი რამიშვილმა (ვიოლონჩელო).
2014 წელს, 1 მარტს გამართულ კლასიკურ კონცერტში კი მონაწილეობდნენ განსაკუთრებული ნიჭით დაჯილდოებული ქართველი და სომეხი მოსწავლეები: ილია ლომთათიძე - ფორტეპიანო (თბილისის ევგენი მიქელაძის სახელობის ცენტრალური სამუსიკო სასწავლებელი), რევაზ ხაინდრავა - ვიოლონჩელო (თბილისის ზაქარია ფალიაშვილის სახელობის ცენტრალური სამუსიკო სკოლა „ნიჭიერთა ათწლედი"), პოლინა სარაფიანი - ვიოლინო (ერევნის პეტრე ჩაიკოვსკის სახელობის სპეციალური საშუალო მუსიკალური სკოლა) და მანე ავაკიანი - ფლეიტა (ერევნის პეტრე ჩაიკოვსკის სახელობის სპეციალური საშუალო მუსიკალური სკოლა).
მასალის გამოყენების პირობები