სახალხო დამცველი უჩა ნანუაშვილი აუტიზმის საერთაშორისო დღესთან დაკავშირებით განცხადებას ავრცელებს და ჯანდაცვის მინისტრს დავით სერგეენკოს აუტისტური სპექტრის აშლილობის მქონე ბავშვთა ადრეული სავალდებულო სკრინინგისა და დიაგნოსტიკის დანერგვისკენ მოუწოდებს. ამასთან სახალხო დამცველი განათლების მინისტრს თამარ სანიკიძესაც მიმართავს უზრუნველყოს აუტისტური სპექტრის აშლილობის მქონე პირთა ზოგადი და პროფესიული განათლების მიღება, მათი შემდგომი დასაქმების ხელშეყობისათვის. ,,ჯი-ეიჩ-ენის" ნანუაშვილის განცხადებას უცვლელად გთავაზობთ: ,,2007 წლის 18 დეკემბერს გაერთიანებული ერების ორგანიზაციის გენერალურმა ასამბლეამ 2 აპრილიაუტიზმის შესახებ ცნობადობის ამაღლების მსოფლიო დღედ გამოაცხადა. ეს დღე საქართველოში წელს მეოთხედ აღინიშნება, რომლის მიზანია გაიზარდოს აუტიზმის შესახებ საზოგადოების ინფორმირებულობა და ხელი შეუწყოს გადაწყვეტილების მიმღებ სახელმწიფო ორგანოებს შეასრულონ საქართველოს მიერ აღებული საერთაშორისო ვალდებულება, უზრუნველყონ შეზუდული შესაძლებლობის, მათ შორის აუტისტური სპექტრის აშლილობის მქონე ადამიანების ფუნდამენტური უფლებების რეალიზება.
აუტიზმი მიეკუთვნება ნეიროგანვითარებითი შეზღუდვების ჯგუფს. საქართველოში ყოველი 110 ბავშვიდან ერთს აუტიზმი აქვს[1]. აუტიზმზე ეჭვის მიტანა დღეს 18 თვიდან შეიძლება. დროული დიაგნოსტიკა და სწორი თერაპია კი, მაქსიმალურად ზრდის იმის შესაძლებლობას, რომ ბავშვი სწორად განვითარდეს, მიიღოს საშუალო/უმაღლესი განათლება და დამოუკიდებლად იცხოვროს.
სკრინინგის არ არსებობა, გვიანი დიაგნოსტიკა, ადრეული ინტერვენციის აუცილებლობა, სარეაბილიტაციო ცენტრებისა და სხვა სოციალური პროგრამების სიმწირე პრობლემათა მცირე ჩამონათვალია, რომელსაც აუტისტური სპექტრის აშლილობის მქონე ადამიანები საქართველოში ყოველდღიურად აწყდებიან.
2013 წლის 30 მაისს ჯანდაცვის მსოფლიო ანსაბლეის აღმასრულებელმა საბჭომ მიიღო რეზოლუცია „ყოველმხრივი და კოორდინირებული ძალისხმევით აუტისტური სპეტრის აშლილობის მართვის" შესახებ. წელს ამ დღესთან დაკავშირებით გაეროს გენერალური მდივნის ბან კი-მუნის მთავარი მოწოდებაა, რომ მონაწილე მხარეებმა გააკეთონ ყველაფერი აუტისისტური სპექტრის აშლილობის მქონე პირების განათლების მხარდაჭერის, დასაქმების შესაძლებლობების ზრდისა და სხვა ყველა იმ ზომის გატარებისათვის, რომელიც აუცილებელია ინკლუზიური საზოგადოების მშენებლობისათვის.
ზემოხსენებულიდან გამომდინარე, აუტისტური სპქტრის აშლილობის მქონე ადამიანების კანონიერი უფლებების დაცვისა და საზოგადოების ცხოვრებაში თანასწორი, სრულფასოვანი და ეფექტური მონაწილეობის მიზნით, საქართველოს სახალხო დამცველი მოუწოდებს საქართველოს შრომის, ჯანმრთელობისა და სოციალური დაცვის სამინისტროს დანერგოს აუტისტური სპქტრის აშლილობის მქონე ბავშვთა ადრეული სავალდებულო სკრინინგი და დიაგნოსტიკა, განავითაროს ადრეული ინტერვენციისა და ბავშვთა განვითარების სარებილიატაციო სახელმწიფო პროგრამები, ასევე საქართველოს განათლებისა და მეცნიერების სამინისტრომ უზრუნველყოს აუტისტური სპექტრის აშლილობის მქონე პირთა ზოგადი და პროფესიული განათლების მიღება, მათი შემდგომი დასაქმების ხელშეყობისათვის", _ნათქვამია განცახდებაში.