აჭარის ავტონომიური რესპუბლიკის ჯანმრთელობისა და სოციალური დაცვის მინისტრმა ნუგზარ სურმანიძემ, აჭარის ავტონომიური რესპუბლიკის ფინანსთა და ეკონომიკის მინისტრ დავით ბალაძესთან, საერთაშორისო ინვესტორთა ასოციაციის ხელმძღვანელ ოსმან მჟავანაძესთან, მინისტრის მოადგილეებთან რომან ბოლქვაძესთან და ნონა გალოგრესთან, ასევე სოციალური დაცვის დეპარტამენტის უფროს ლელა სურმანიძესთან ერთად მახინჯაურში მდებარე შშმ პირთა სარეაბილიტაციო ცენტრის რეაბილიტირებული შენობა მოინახულა.
შენობის სრული რეკონსტრუქცია რამდენიმე თვის წინ დასრულდა, დაწესებულების ოფიციალური გახსნა უახლოეს პერიოდში გაიმართება. სარეაბილიტაციო ცენტრში შეზღუდული შესაძლებლობების მქონე პირთა დღის ცენტრი და მიუსაფარ დედათა და ბავშვთა თავშესაფარი ფუნქციონირებს. აქ რეაბილიტაციის კურსს 40-მდე შეზღუდული შესაძლებლობების მქონე პირი გადის, თავშესაფარში კი 6 მარტოხელა დედა 8 შვილთან ერთად ცხოვრობს.
შშმ პირთა სარეაბილიტაციო ცენტრის სრული რეაბილიტაცია „თურქეთის განვითარებისა და თანამშრომლობის სააგენტომ" განახორციელა. დაწესებულება მახინჯაურის ჩვილ ბავშვთა სახლის ყოფილი შენობის ბაზაზე ფუნქციონირებს. შენობა აჭარის ფინანსთა და ეკონომიკის სამინისტრომ სამედიცინო ასოციაცია „თანა"-ს 2013 წლის დასაწყისში 10 წლის ვადით უსასყიდლო სარგებლობის უფლებით გადასცა.
მასალის გამოყენების პირობები