დღეს, თბილისის საკრებულოს ადამიანის უფლებათა დაცვის კომისიის და ქალაქ თბილისის მერიის ორგანიზებით, შოთა რუსთაველის სახელობის სახელმწიფო თეატრის დიდ დარბაზში, საქართველოს პირველი პრეზიდენტის, ზვიად გამსახურდიას 75 წლისთავისადმი მიძღვნილი საღამო გაიმართება.
ორგანიზატორების ინფორმაციით, საღამოზე ნაჩვენები იქნება კადრები არქივიდან, რომელიც საქართველოს დამოუკიდებლობის აქტის მიღებას და სხვა მნიშვნელოვან მოვლენებს ასახავს. ასევე, სიტყვით გამოვლენ პრეზიდენტის თანამოაზრეები. მსახიობები სცენაზე ზვიად გამსახურდიას ნაწარმოებებს გააცოცხლებენ, შესრულდება კლასიკური და ფოლკლორული მუსიკის რამოდენიმე ნაწარმოები. თეატრის ფოიეში მოეწყობა ფოტოგამოფენა.
თბილისის საკრებულოსა და მერიის ინიციატივით წესდება ზვიად გამსახურდიას სახელობის პრემია, რომელიც ყოველ ორ წელიწადში ერთხელ გაიცემა ლიტერატურის, მეცნიერებისა და პუბლიცისტიკის სფეროში განსაკუთრებული მიღწევებისთვის. საიუბილეო საღამოს მსვლელობისას მოხდება პრემიის გადაცემა პირველი ლაურეატებისთვის.