31 მარტს, 11:00 საათზე, საქართველოს სხვადასხვა რეგიონის 44 მოსწავლე ინგლისური ენის მართლწერის ეროვნულ კონკურსში მონაწილეობისათვის აგრარულ უნივერსიტეტში (აღმაშენებლის ხეივანი #240) შეიკრიბება.
როგორც |ჯი-ეიჩ-ენს" საქართველოში აშშ-ს საელჩოდან აცნობეს, უკანასკნელი რამდენიმე თვის განმავლობაში ინგლისური ენის მართლწერის ადგილობრივ კონკურსებში მთელი საქართველოს 193 სკოლის 2,000-ზე მეტი მოსწავლე ჩაება. 350-ზე მეტი მოსწავლე რეგიონულ კონკურსში გავიდა და თბილისში, ეროვნულ კონკურსში მონაწილეობის უფლებისთვის იბრძოლა.
ეროვნული კონკურსი ორ ეტაპად გაიმართება - ჯერ მე-8 და მე-9 კლასების ფინალისტები იასპარეზებენ, შემდეგ მე-10, მე-11 და მე-12 კლასელები. კონკურსის შემდეგ, აშშ-ის ელჩის მოვალეობის შემსრულებელი ბრიჯიტ ბრინკი მოსწავლეების, მასწავლებლების, მსაჯების, სპონსორებისა და მოხალისეებისათვის საგანგებო მიღებას გამართავს. თითოეული ასაკობრივი ჯგუფის ფინალისტებს აშშ-ის საელჩოს პრიზები გადაეცემათ.
ინგლისური ენის მართლწერის ეროვნული კონკურსი 2012 წელს, მშვიდობის კორპუსის მოხალისეებმა დაარსეს. 2013 წელს „ინგლისური ენის მართლწერის ეროვნული კონკურსი" არასამთავრობო ორგანიზაციად დარეგისტრირდა. მისი ამოცანაა საქართველოს მოსწავლეებისა და მასწავლებლების საგანმანათლებლო უნარ-ჩვევების ხელშეწყობა. არასამთავრობო ორგანიზაცია ქართველი და მშვიდობის კორპუსის მოხალისეებისაგან შემდგარ მრჩეველთა კომიტეტთან თანამშრომლობს. კომიტეტი ინგლისური ენის უკეთ შესასწავლად მოტივაციისა და შემოწმედებითი მიდგომების ამაღლებაზე მუშაობს.
