დღეს, სახელმწიფო დაცვის სპეციალურ სამსახურს ივერიის ღვთისმშობლის ხატის სახელობის ტაძრისა და სავანეს მშენებლობის ფონდ „ივერიისას" დამფუძნებელი, ცნობილი ხელოვანი და ქველმოქმედი პაატა ბურჭულაძე ესტუმრა, რომელმაც უწყების თანამშრომლებთან შეხვედრაზე მახათას მთაზე მშენებარე ტაძრის მნიშვნელობაზე ისაუბრა.
პაატა ბურჭულაძემ სამსახურის თანამშრომლებს ტაძრის და სავანეს
მშენებლობისთვის საჭირო ფინანსური სახსრების შეგროვების უნიკალური სქემის შესახებ დეტალური ინფორმაცია მიაწოდა.
მიუხედავად იმისა, რომ აქციაში მონაწილეობა ნებაყოფლობითია, მას სახელმწიფო დაცვის სპეციალური სამსახურის პირადი შემადგენლობა სრულად შეუერთდა. სამსახურის უფროსის, ბატონ თეიმურაზ მღებრიშვილის თქმით, ტაძრის მშენებლობაში საკუთარი წვლილის შეტანით სამსახური ამაყობს.
შეხვედრის დასასრულს, ათონის მთის ივერიის ღვთისმშობლის ხატის შესახებ ფილმის „ღირს არს ჭეშმარიტად" პრეზენტაცია მოეწყო და თანამშრომლებს საჩუქრად ხატები და ლოცვანი გადაეცათ. საქართველოს კათალიკოს-პატრიარქმა, უწმინდესმა და უნეტარესმა, ილია II ტაძრის საძირკველი 2011 წელს აკურთხა, ხოლო მშენებლობა 2012 წლის გაზაფხულზე დაიწყო.