როგორც კვლევამ აჩვენა, მამაკაცები ნაკლებად სარგებლობენ ინდივიდუალური კერვის მომსახურებით (5%) და მზა ტანსაცმელს ანიჭებენ უპირატესობას (90%). ქალებს კი სავარაუდოდ ბევრად მეტი დრო ემეტებათ მათ სხეულზე და გემოვნებაზე ინდივიდუალურად მორგებული ტანისამოსისთვის - მათი 28% პერიოდულად მიმართავს დიზაინერს/კერძო მკერავს.

თბილისელი ქალების მესამედი (30%) აცხადებს, რომ 10 წლის წინ უფრო ხშირად იკერავდა ტანსაცმელს ვიდრე ეხლა. მსგავსი ქცევა დაფიქსირდა თბილისელი კაცების 14%-ში. საგულისხმოა, რომ ორივე სქესის წარმომადგენლების შემთხვევაში, მათი რიცხვი ვინც 10 წლის წინ უფრო ხშირად იკერავდა ტანსაცმელს, თითქმის სამჯერ აღემატება იმათ, ვინც ახლა უფრო ხშირად მიმართავს აღნიშნულ მომსახურებას (9% ქალი, 5% კაცი).

„ყველასათვის ცნობილია, რომ საბჭოთა პერიოდში ადგილობრივი ტანსაცმლის წარმოების არარსებობის გამო, სხვა პრობლემებთან ერთად, საზოგადოება მზა ტანსაცმლისა და ფეხსაცმლის მუდმივ დეფიციტს განიცდიდა. თუმცა თბილისელები ყოველთვის ახერხებდნენ კერძო მკერავებისა და მეწარეების საშუალებით არ ჩამორჩენილიყვნენ „რკინის ფარდის" მიღმა არსებულ მოდის ტენდენციებს.
მას შემდეგ ბევრი რამ შეიცვალა. ადგილობრივი მზა ტანსაცმლის წარმოება ნაკლებად განვითარდა, მაგრამ გაიზარდა უცხოური ბრენდული პროდუქციის იმპორტი და შესაბამისად გარდერობის განახლებისას თბილისელების ბევრად უფრო მრავალფეროვანი არჩევანი აქვთ. ეისითი დაინტერესდა დღეს თბილისელების რა ნაწილი მიმართავს დიზაინრებს/მკერავებს ინდივიდუალური ტანისამოსის შეკერვის მიზნით და რა ნაწილი ყიდულობს მზა პროდუქციას.
გამოკითხვა ჩატარდა 407 ზრდასრულ თბილისელს შორის, 2014 წლის თებერვალში, მონაცემთა სტატისტიკური ცდომილება არ აღემატება 4,75%-ს"- აცხადებენ „ეისითიში".