სახალხო დამცველი უჩა ნანუაშვილი ექს-პრეზიდენტის მიხეილ სააკაშვილის დაკითხვაზე დაბარებას ეხმიანება და აცხადებს, რომ სააკაშვილი თუ გამოძიების კითხვებს არ უპასუხებს, საზოგადოებაში გაჩნდება განცდა რომ ის კანონზე მაღლა დგას.
ნანუაშვილის განცხადებით, როცა გამოძიებას აქვს კონკრეტული კითხვები მოწმის მიმართ, დასაკითხად გარდა უშუალოდ ფიზიკური დასწრებისა, შესაძლებელია სხვა ფორმა იყოს გამოყენებული.
"მე ვფიქრობ, შესაძლებელია იყოს გამოყენებული დაკითხვის სხვა ფორმა, თუნდაც ელექტრონული, თუნდაც სკაიპით ან სხვა ალეტრანტიული მეთოდით. ვფიქრობ, არ უნდა იყოს არანაირი პრობლემა, როდესაც გამოძიებას აქვს კონკრეტული კითხვები მოწმის მიმართ, შესაძლებელია იყოს სხვა ფორმა გამოყენებული გარდა უშუალოდ ფიზიკური დასწრების. ვფიქრობ, ალბათ, ეს ფორმაც უნდა იყოს გამოძებნილი. არ მგონია, ამაზე შეთანხმება არ მოხდეს, რადგან ეს მე ვფიქრობ, გაცილებით მარტივია და გამოძიებას უფრო მეტ ინფორმაციას მისცემს. შესაბამისად, პრეზიდენტი აღარ იქნება კანონზე მაღლა. იმ შემთხვევაში თუ ყოფილი პრეზიდენტი არ მიიღებს მონაწილეობას და არ გასცემს კითხვებზე პასუხებს, რა თქმა უნდა, დარჩება საზოგადოებას განცდა, რომ პრეზიდენტი დგება კანონზე მაღლა. ეს, რა თქმა უნდა, არ იქნება მისასალმებელი", - განაცხადა ნანუაშვილმა.
შეგახსენებთ, რომ მიხეილ სააკაშვილი პროკორატურაში მოწმის სტატუსით დასაკითხად დღეს, 13:00 საათზეა დაბარებული.