„საქართველოს ახალგაზრდა კონსტიტუციონალისტთა ასოციაცია" 2014 წლის ადგილობრივი თვითმმართველობის არჩევნებში მოსახლეობის აქტივობის სტიმულირებისთვის რიგი ღონისძიებების გამართვას გეგმავს. ასოციაციამ გაანალიზა ქვეყანაში ჩატარებული ადგილობრივი თვითმმართველობის არჩევნების აქტივობის სტატისტიკა. ცესკოს ოფიციალური მონაცემების ანალიზმა ცხადყო, რომ ყველაზე მაღალი აქტივობა 2010 წლის თვითმმართველობის არჩევნებზე დაფიქსირდა და 47% შეადგინა, რაც 2013 წლის საპრეზიდენტო არჩევნებზე დაფიქსირებული მონაცემების იდენტურია. ეს ფაქტი კი თვითმართველობის არჩევნებისადმი მოსახელობის მზარდ ინტერესზე მეტყველებს.
მიუხედავად იმისა, რომ უშუალოდ ადგილობრივი თვითმმართველობის არჩევნებში ამომრჩევლის აქტივობის ზრდის ტენდენცია ფიქსირდება, არსებობს საფრთხე მიზანმიმართული საარჩევნო კამპანიის წარმოების, რომელიც მიმართული იქნება ამომრჩეველში ნიჰილიზმის გაღვივებისკენ. საპრეზიდენტო არჩევნებისას საზოგადოებას კარგად ახსოვს მიზანმიმართული კამპანია, რომლის დროსაც პერმანენტულად ხდებოდა აპელირება მოსალოდნელი მეორე ტურის შესახებ და ეს მოსახლეობაში ბევრს კითხვის ნიშანს აჩენდა.
„ახალგაზრდა კონსტიტუციონალისტთა ასოციაცია" მაშინაც საუბრობდა საარჩევნო პროცესისს დისკრედიტაციის შესახებ და დღესაც ხედავს ალბათობას იდენტური პროცესების განვითარებისა.
აღნიშნულთან დაკავშირებით ორგანიზაციამ მიიღო გადაწყვეტილება ფართომასშტაბიანი სამოქალაქო კამპანიის წამოწყების თაობაზე, რომლის ფარგლებშიც ასოციაციის წევრები, როგორც თბილისში, ისე რეგიონებში საზოგადოების წარმომადგენლებთან უშუალო შეხვედრებს გამართავენ. მსგავსი ტიპის დისკუზიები ხელს შეუწყობს მოქალაქეების ცნობიერების ამაღლებას საარჩევნო საკითხებთან დაკავშირებით და ზოგადად საარჩევნო გარემოს გაუმჯობესებას. გარდა ამისა, ,,ახალგაზრდა კონსტიტუციონალისტები" ამომრჩევლებს ინფორმაციას საარჩევნო უფლებებისა და ახლადამოქმედებული თვითმმართველობის კოდექსის ნიუანსების შესახებაც მიაწვდიან.
„საქართველოს ახალგაზრდა კონსტიტუციონალისტთა ასოციაცია" ცენტრალურ საარჩევნო კომისიას მოუწოდებს, რაც შეიძლება ინტენსიურად აწარმოოს სარეკლამო-სააგიტაციო კამპანია 2014 წლის ადგილობრივი თვითმმართველობის არჩევნებთან დაკავშირებით.
იმისთვის, რომ ადგილობრივი თვითმმართველობის არჩევნები ჯანსაღ და დემოკრატიულ გარემოში ჩატარდეს, ასოციაცია მზად არის აქტიურად ითანამშრომლოს, როგორც ცენტრალურ საარჩევნო კომისიასთან, ისე, კოლეგა არასამთავრობო ორგანიზაციებთან.
