ყოფილი პრემიერ-მინისტრის ზურაბ ჟვანიას მეუღლემ ნინო ქადაგიძე-ჟვანიამ ყოფილი პრეზიდენტის მიხეილ სააკაშვილის გუშინ გაკეთებულ განცხადებას სპეციალურ პრესკონფერენციაზე უპასუხა და განაცხადა, რომ სააკაშვილმა მას უთხრა, ყველაფერი ეთხოვა იმ მიზნით, რომ ჟვანიას საქმეს არ გამოიძიებდა.
,, ვფიქრობ, ასეთი აჟიოტაჟის ატეხვა მხოლოდ ერთ მიზანს ემსახურება, რომ გამოძიების ნორმალური მსვლელობიდან ყურადღება გადატანილი იქნას სკანდალურ საკითხებზე, რომელიც ხელს შეუშლის გამოძიებას და აკეთებენ ამ საქმის პოლიტიზაციას", _განაცახდა ნინო ქადაგიძე-ჟვანიამ.
მისივე განმარტებით მასა და მიხეილ სააკაშვილს რამდენიმე შეხვედრა ჰქონდათ ძირითადად ერთი და იგივე შინაარსის.
,, შემიძლია შევაჯამო შეხვედრები მიშას სიტყვებით, მიშამ მითხრა მთხოვე რაც გინდა ოღონდ გამოძიებას თავი დაანებეთ. ეს არის მისი სიტყვები. რაც შეეხება თანხას, ერთადერთი შემთხვევა, როცა თანხაზე მქონდა ლაპარაკი იყო მხოლოდ იმ კონტექსტში როცა მე ვცდილობდი მელაპარაკა სხვა ვერსიებზეც. ერთ-ერთი ვერსია იყო ის, რომ რახან დაცვის უფროსმა ჯიბიდან გასაღები ამოიღო, ღამე გახსნა მისი ორივე სეიფი, იქნებ აქ იყო ადამიანური ანგარების მომენტიც და მკვლელობა მოხდა შეიძლება იმის გამო, რომ ამ ადამიანმა რაღაცა მოიპარა და შეიძლება, ეს თანხაც ყოფილიყო. მით უმეტეს, ვიცოდი, რომ ჩემი პირადი ნივთები რომელიც სეიფებში იყო დაკარგული იყო. ეს იყო სულ რაც თანხაზე საუბარი იყო", _განაცხადა ნინო ჟვანიამ, რომელიც მიხეილ სააკაშვილის ბრალდებებს ბიზნესმენ ბადრი პატრკაციშვილთან მიმართებაშიც სიცრუეს უწოდებს.
მისვე თქმით, იგი არ განეკუთვნება იმ ადამიანების კატეგორიას ვინც საკუთარი ოჯახის ღირსებით ვაჭრობენ.
,,მე არ განვეკუთნები იმ ადამიანების კატეგორიას, რომლებიც საკუთარი ოჯახის ღირსებით ვაჭრობენ", _განაცხადა ნინო ჟვანიამ.
შეგახსენებთ, რომ საქართველოს ექს-პრეზიდენტმა მიხეილ სააკაშვილმა "რუსთავი 2"-სთვის მიცემულ ინტერვიუში ყოფილი პრემიერ-მინისტრის, ზურაბ ჟვანიას მეუღლე ნინო ქადაგიძესთან შეხვედრის დეტალები გაიხსენა.
"როცა ზურაბი გარდაიცვალა, რამდენიმე ხნის შემდეგ უცნაური რაღაცეების ლაპარაკი დაიწყეს მისმა ოჯახის წევრებმა - მისმა ძმამ, მეუღლემ. მეუღლეს ვთხოვე, რომ ჩემთან მოსულიყო, მოვიდა. მე ვუთხარი, რაზეა ლაპარაკი, ნინო, შენ ხომ იყავი ადგილზე, სადაც ეს მოხდა, ნახე ყველაფერი, რაც მოხდა, ყველაფერს ესწრებოდი, შენ გგონია, რომ ვინმე რამეს მალავს ან სხვანაირად არის თუ..., არა, არა მგონიაო. თქვა, შენთან რა პრეტენზია შეიძლება მქონდესო. მაგრამ არასოდეს დამავიწყდება რაც მითხრა: ხომ იცი, ზურას როგორც ყველა პოლიტიკოსს, ბევრი ფული ჰქონდაო, მე ვუთხარი, მე ვარ პოლიტიკოსი და ნამდვილად არ მაქვს ფული და არა მგონია ზურას ჰქონოდა ფული და საიდან მოიტანე-მეთქი. ერთ-ერთმა მითხრა, რომ ორი დღით ადრე მისცა მას ძალიან დიდი თანხაო და ამ თანხის ნაწილი მინდა ამოვიღოო, ალბათ იმ დაცვის თანამშრომლებმა, სანამ ჩვენ მივდიოდით, ხომ არ წაიღეს ეს თანხა შემთხვევითო. მე ვუთხარი - ახლა გამოდის, რომ აქ ფულზე ვლაპარაკობთ ხომ ჩვენ, ფულზე ვერ შევთანხმდებით ჩვენ-თქო. მერე გაირკვა, რომ პატარკაციშვილმა, როგორც ჩანს ორი დღით ადრე უთხრა, რომ ჟვანას მისცა ბევრი ფული და ეს გააკეთა შეგნებულად იმიტომ, რომ პატარკაციშვილი მერე ამუშავებდა ჟვანიას ძმას, მასთან ოფისში, ისე, როგორც ყველა ოლიგარქს უნდოდა ამ თემის აგორება", - განაცხადა სააკაშვილმა.
მან აღნიშნა, ჟვანას გარდაცვალებამდე რამდენჯერმე ესაუბრა და საღამოსაც, როცა ნახა, ძალიან ბედნიერი და კარგ ხასიათზე იყო.
"შემდეგ დამირეკა კობა ხარშილაძემ, რომელიც ახლა დაჭერილია, რომ ეს უბედურება მოხდა და ზურაბი გარდაიცვალაო. რეკავდა ზურას ტელეფონით და რომ ავიღე, ხო ზურა მეთქი. ეს იყო წარმოუდგენელი შოკი ჩვენთვის", - განაცხადა სააკაშვილმა.