არასამთავრობო ორგანიზაცია „ადამიანი, კანონი, თავისუფლება" ბოლოდროინდელი მოვლენებიდან გამომდინარე, ვეტერანთა საქმეთა დეპარტამენტთან არსებულ ვდ. სანიკიძის სახელობის ჰოსპიტალში არსებული მდგომარეობით დაინტერესდა.
ორგანიზაციის წევრები ჰოსპიტლის ხელმძღვანელს, გია მაცაბერიძეს, მომსახურე პერსონალსა და ომის ვეტერანებს შეხვდნენ და დაწესებულებაში არსებულ მდგომარეობას ადგილზე გაეცნენ.
ომის ვეტერანთა მთავარ პრობლემას ჰოსპიტლის შენობის ავარიული მდგომარეობა წარმოადგენს, რომელიც სასწრაფოდ აღდგენა-რესტავრაციას საჭიროებს. გამომდინარე იქიდან, რომ არსებობს ზემოაღნიშნულ შენობის ჩამონგრევის საფუძვლიანი საფრთხე, აუცილებელია ვეტერანთა სამკუნალო დაწესებულებისათვის ალტერნატიული ფართის დაუყონებლივ გამოყოფა, რათა შესაძლებელი გახდეს პაციენტთა სრულყოფილი მომსახურება.
როგორც ორგანიზაციისათვის გახდა ცნობილი, ამჟამად საქართველოში 70 000 ომის ვეტერანია დარეგისტრირებული, მათ შორის 10 000 ამბულატორიულ მკურნალობას გადის, ხოლო ჰოსპიტალის სტაციონარში 65 პაციენტია განთავსებული.
აღსანიშნავია, რომ ომის ვეტერანთა პრობლემების მოსაგვარებლად ხელისუფლება მზად ყოფნას გამოხატავს, სამკურნალო დაწესებულება საქვეუწყებო დაწესებულების სტატუსიდან უკვე გადავიდა უშუალოდ მთავრობის დაქვემდებარებაში.