თბილისის საკრებულოს დელეგაციის ვიზიტი სტრასბურგში, ევროსაბჭოს ადგილობრივი და რეგიონალური თვითმართველობის 26-ე პლენარულ სესიის ფაგლებში გრძელდება.
დელეგაციას, რომლის შემადგენლობაში საკრებულოს თავმჯდომარის მოადგილე, გიორგი ტყემალაძე (რომელიც ამავდროულად არის ევროპის საბჭოს რეგიონალური და ადგილობრივი თვითმმართველობის კონგრესის მუდმივმოქმედი დელეგაციის წევრი) და ფრაქცია „დედაქალაქის" თავმჯდომარე, კონსტანტინე იონათამიშვილი შედიან, საკრებულოს თავმჯდმომარე ირაკლი შიხიაშვილი ხელმძღვანელობს.
25 მარტს თბილისის საკრებულოს დელეგაციამ ორი შეხვედრა გამართა.
პირველი შეხვედრა გაიმართა კონგრესის პრეზიდენტთან, ჰერვინგ ვან სტაასთან, კონგრესის გენერალურ მდივანთან ანდრეას კიეფერთან და კონგრესის დირექტორთან, მანუელ ლეზერტუასთან, ხოლო მეორე შეხვედრა შედგა საქართველოს საკითხებზე კონგრესის მომხსენებლებთან ნიგელ მერმაგენთან და ელენა პილაჯასაართან.
ირაკლი შიხიაშვილმა კონგრესის პრეზიდენტსა და გენერალურ მდივანს ინფორმაცია უკანასკნელ თვეებში თბილისის ბიუჯეტთან დაკავშირებით განვითარებული მოვლენების თაობასა და საქართველოში აკრედიტებულ დიპლომატებთან შეხვედრის შესახებ მიაწოდა.
გარდა ამისა, საკრებულოს დელეგაციამ ევროპელ კოლეგებს თბილისში არსებული ვითარება იმ მიმართულებითაც გააცნო, რომ თბილისი, როგორც ერთ-ერთი უძველესი ქალაქი, საჭიროებს რეაბილიტაციას და სხვადასხვა პროექტების დაგეგმვას.
თბილისის საკრებულოს ინფორმაციით, მხარეებმა ასევე ისაუბრეს საქართველოს ხელისუფლებაში „ქართული ოცნების" მოსვლის შემდეგ ქვეყანაში მიღწეულ წინსვლაზე და ქვეყანაში არსებულ პოლიტიკურ ვითარებაზე.
საქართველოს საკითხებზე კონგრესის მომხსენებლებთან ნიგელ მერმაგენთან და ელენა პილაჯასაართან შეხვედრაზე ირაკლი შიხიაშვილმა ევროპელ კოლეგებს ინფორმაცია საქართველოში მიმდინარე მოვლენებთან დაკავშირებით დეტალურად წარმოუდგინა და ევროპული მხარისგან აქტიური მხარდაჭერა მიიღო.
შეხვედრებზე საუბარი შეეხო ასევე საქართველოში მოსალოდნელ ადგილობრივი თვითმმართველობის არჩევნებს და თბილისის საკრებულოს დელეგაციამ ევროპელი კოლეგები არჩევნებზე დამკვირვებლებად მოიწვია.
ევროპულმა მხარემ მოწვევა მიიღო და მზადყოფნა გამოთქვა, ამ პროცესებში აქტიურად ჩაერთოს.
გარდა ამისა, შეხვედრებზე მხარეებმა საქართველოს თვითმმართველობის კოდექსში განხორციელებულ ცვლილებებზე დეტალურად ისაუბრეს, რის შემდეგაც აღნიშნულ საკითხზე აქტიური კონსულტაციების გამართვა დაიგეგმა.
