„ეს კონკურსი არის მკითხველთან ურთიერთობის კიდევ ერთი გზა. ჩვენთვის ყველა მონაწილე ძალზედ მნიშვნელოვანია". საქართველოს პარლამენტის ეროვნული ბიბლიოთეკის გენერალური დირექტორის მოადგილე მირიან ხოსიტაშვილი.

საქართველოს პარლამენტის ეროვნული ბიბლიოთეკა იწყებს ახალ პროექტს -„მკითხველთა კონკურსი", რომლის მიზანია მკითხველთა წახალისება, წიგნის კითხვის პოპულარიზაცია და წიგნიერების დონის ამაღლება საქართველოში.
კონკურსი ყოველწლიური იქნება და მასში მონაწილეობა ეროვნული ბიბლიოთეკის ნებისმიერ მკითხველს შეეძლება.
„მკითხველთა კონკურსი 2014"-ის პირობაა, კონკურსანტებს წაკითხული ჰქონდეთ ჯემალ ქარჩხაძის „ანტონიო და დავითი" და ალბერ კამიუს „უცხო". კონკურსანტები შეავსებენ ამ წიგნებზე შედგენილ ტესტებს.
საუკეთესოები გადავლენ კონკურსის მეორე ეტაპზე, სადაც კონკურსანტებმა ჟიურის ამ ორი წიგნის შესახებ პრეზენტაციები უნდა წარუდგინონ.
გამარჯვებულად დასახელდება სამი საუკეთესო პრეზენტაციის ავტორი.
ეროვნული ბიბლიოთეკა პირველ ადგილზე გასულს გადასცემს „ქინდლს" და სერტიფიკატს „მკითხველთა კონკურსი 2014"-ის გამარჯვებული. მეორე ადგილზე გასულს კომპანია ჯეოსელი "ჯეოსელ კონექტს" და "პაკეტ მეტს" გადასცემს. მესამე ადგილზე გასული კი დაჯილდოვდება ორიგინალური ჭადრაკითა და წიგნებით, რომელსაც გამომცემლობები „ინტელექტი" და „დიოგენე" გადასცემენ.
გამარჯვებულ კონკურსანტებს პრიზები საქართველოს პარლამენტის ეროვნულ ბიბლიოთეკაში მოწყობილ საზეიმო ცერემონიალზე გადაეცემათ.

კონკურსის ეტაპები:
1 ეტაპი: (24 მარტიდან 8 აპრილამდე)
კონკურსანტები თავდაპირველად გაივლიან რეგისტრაციას. რეგისტრაცია იწარმოება ეროვნულ ბიბლიოთეკაში, სადაც მკითხველი ავსებს სარეგისტრაციო ფურცელს, რომელზედაც მითითებულია: სახელი და გვარი, საკონტაქტო ინფორმაცია (ტელეფონის ნომერი, ელ. ფოსტა), ეროვნული ბიბლიოთეკის მკითხველის ბარათის ნომერი და განათავსებს სარეგისტრაციო ყუთში, რომელიც ეროვნული ბიბლიოთეკის სამკითხველო დარბაზებშია განთავსებული.
რეგისტრაციის პირობები:
• თუ პირი არ არის ეროვნული ბიბლიოთეკის მკითხველი, მან უნდა აიღოს მკითხველის ბარათი (ეროვნულ ბიბლიოთეკაში მკითხველის ბარათის აღება უფასოა);
• შეავსოს რეგისტრაციის ბარათის ყველა პუნქტი და განათავსოს ყუთში;
• რეგისტრაციის დასრულების შემდგომ ყველა მონაწილეს 10 და 11 აპრილს ელექტრონული ფოსტის საშუალებით დაუდასტურდებათ რეგისტრაციის წარმატებით გავლა.

რეგისტრაციის გავლის ბოლო ვადაა 8 აპრილი.
2 ეტაპი: (15-16 აპრილი)
რეგისტრაციის დასრულების შემდგომ კონკურსანტები გაივლიან ტესტირებას ჯემალ ქარჩხაძის „ანტონიო და დავითისა" და ალბერ კამიუს „უცხოს" შესახებ. ტესტი შედგენილი იქნება ამ ორი ნაწარმოების მიხედვით. შემდეგ ეტაპზე გადასვლას შეძლებენ ისინი, ვინც გადალახავენ 30 ქულას (მაქსიმალური ქულა 50).
ტესტის ქულებს შემდეგ ეტაპზეც (პრეზენტირებისას) მიექცევა ყურადღება.
ტესტირება ჩატარდება 15 და 16 აპრილს საქართველოს პარლამენტის ეროვნულ ბიბლიოთეკაში.
23 აპრილს ყველა მონაწილეს ელექტრონულად გაეგზავნებათ შეტყობინება ტესტირების წარმატებით (ან პირიქით) გავლის შესახებ.

3 ეტაპი: (28-29 აპრილი)
ტესტირების შედეგად დარჩენილი კონკურსანტები ჩაატარებენ პრეზენტაციებს ჯემალ ქარჩხაძის „ანტონიო და დავითის" და ალბერ კამიუს „უცხოს" შესახებ. საპრეზენტაციოდ თითო მომხსენებელს10 წუთი დაეთმობა.
პრეზენტაციის შეფასება ტექსტების ცოდნის, გაგების, ანალიზისა და ნაწარმოებების შეფასების კრიტერიუმებით მოხდება.
პრეზენტაციებს შეაფასებენ საქართველოს პარლამენტის ეროვნული ბიბლიოთეკის გენერალური დირექტორი გიორგი კეკელიძე; ეროვნული ბიბლიოთეკის გენერალური დირექტორის მოადგილე მირიან ხოსიტაშვილი; პროფესორი და მეცნიერების კულტურისა და სამოქალაქო განათლების დეპარტამენტის დირექტორი ემზარ ჯგერენაია; თბილისის ივანე ჯავახიშვილის სახელობის უნივერსიტეტის დოქტორანტი გიორგი წეროძე, პოეტი ზაალ ჩხეიძე და მოწვეული სტუმარი.

4 ეტაპი: (1 მაისი)
1 მაისს გამოვლინდება გამარჯვებული და საზეიმო დაჯილდოვება საქართველოს პარლამენტის ეროვნულ ბიბლიოთეკაში გაიმართება.