ათენში სამხრეთ საბერძნეთის დიასპორული ორგანიზაციების საკოორდინაციო საბჭოს შეხვედრა შედგა.
საქართველოს საგანგებო და სრულუფლებიანი ელჩი საბერძნეთში დავით ბაქრაძე ათენის კულტურის ცენტრში ათენისა და სამხრეთ საბერძნეთის ქართული დიასპორული ორგანიზაციების ხელმძღვანელების შეხვედრას დაესწრო.შეხვედრაზე განიხილეს წესდება საკოორდინაციო საბჭოს ფორმირებისათვის.
დავით ბაქრაძემ ორგანიზაციების წარმომადგენლებს მიაწოდა ინფორმაცია საქართველოს საშინაო და საგარეო პოლიტიკის აქტუალურ საკითხებთან და ქვეყნის წინაშე მდგარ გამოწვევებთან დაკავშირებით. მან ხაზი გაუსვა დიაპორული ორგანიზაცების საქმიანობის მნიშვნელობას, როგორც ქვეყნის განვითარების, ისე საზღვარგარეთ საქართველოს წარმოჩენისა და მხარდაჭერის საქმეში. როგორც ელჩმა აღნიშნა, საქართველოს საელჩო აქტიურად უჭერს მხარს საკოორდინაციო საბჭოს ადგილობრივ ორგანიზაციებთან თანამშრომლობას, ასევე სხვადასხვა სახის ღონისძიებებისა და პროექტების განხორციელებას.
საბერძნეთში მოქმედი დიასპორული ორგანიზაციები შეთანხმდნენ საკოორდინაციო საბჭოს წესდების პროექტზე და გამოთქვეს მზადყოფნა წესდების ხელმოწერასთან და სამომავლოდ საქმიანობის კოორდინირებასთან დაკავშირებით. შეხვედრას საპატიო სტუმრის რანგში ოლიმპიური ჩემპიონი კახი კახიაშვილიც ესწრებოდა.