საქართველოს ტექნიკური უნივერსიტეტის საკონფერენციო დარბაზში ევროკავშირის პროგრამის black sea-ს ფარგლებში გამარჯვებული გრანტის "შავი ზღვის სანაპირო რეგიონების გარემოსდაცვითი პრობლემების ინტეგრირებული მონიტორინგი და მათი გადაჭრის გზები" მონაწილე ქვეყნების ხელმძღვანელი კომიტეტის პირველი სხდომა და სამეცნიერო სემინარი ჩატარდა.
ღონისძიების ორგანიზატორი იყო კავშირი "მეცნიერება და ენერგეტიკა" (საქართველო). კომიტეტის სხდომასა და სემინარში მიიღეს მონაწილეობა საბერძნეთიდან _ ქ. სალონიკის მუნიციპალიტეტმა, თურქეთიდან _ კარადენიზის ტექნიკურმა უნივერსიტეტმა, სომხეთის არქიტექტურისა და მშენებლობის სახელმწიფო უნივერსიტეტისა და საქართველოს კავშირი "მეცნიერება და ენერგეტიკის" წარმომადგენლებმა.
განიხილებოდა შავიზღვისპირეთის, კერძოდ, სალონიკის, ტრაპზონისა და ფოთის პორტებში წყლის დაბინძურებასთან არსებული პრობლემები. ძირითადი მომხსენებელი იყო საქართველოს ტექნიკური უნივერსიტეტის სრული პროფესორი შალვა გაგოშიძე, რომელმაც შეაჯამა პროგრამის პირველი ეტაპის: წყლის ხარისხის მონიტორინგი, სინჯის აღების მეთოდოლოგია კვლევის ძირითადი შედეგები.
ჩატარებულ ექსპერიმენტებზე ისაუბრეს თურქეთის კარადენიზის უნივერსიტეტის პროფესორმა კადირ სეიჰანმა, საქართველოს ტექნიკური უნივერსიტეტის სრულმა პროფესორმა ვაჟა ჯამარჯაშვილმა, თბილ-წყალ-გეოს წამყვანმა თანამშრომელმა ელიზბარ ხატიაშვილმა, სალონიკის მუნიციპალიტეტის წარმომადგენელმა ვოულა თზოუმატამ და პროექტის მენეჯერმა პოლიკარპუს კარკავიტასმა. დისკუსიაში მონაწილეობა მიიღეს, აგრეთვე, ევროინტეგრაციის სახელმწიფო მინისტრის აპარატის, ენერგეტიკისა და გარემოს დაცვის სამინისტროს წარმომადგენლებმა, რომლებმაც დადებითად შეაფასეს სამეცნიერო სემინარის მუშაობა, აღნიშნეს, რომ იგი ჩატარდა საქმიან, კონსტრუქციულ და მეგობრულ ატმოსფეროში. საქმიანი ნაწილის დამთავრების შემდეგ სტუმრები გაეცნენ ქალაქის ღირსშესანიშნაობებს, წასვლის წინ მადლობა გადაუხადეს ორგანიზატორებს გაწეული სამუშაოსთვის და გაისაუბრეს შემდგომი შეხვედრების აუცილებლობაზე.
