თბილისის საკრებულოს თავმჯდომარე ირაკლი შიხიაშვილი თბილისის მერის მოვალეობის შემსრულებელს, სევდია უგრეხელიძეს თბილისის სამი გამგებლის გათავისუფლების მოთხოვნით მიმართავს.
ირაკლი შიხიაშვილი საკრებულოში 20-მდე არასამთავრობო ორგანიზაციის წარმომადგენელს შეხვდა, სადაც, გუშინ, სარევიზიო კომისიის დასკვნასთან დაკავშირებით სამი რაიონის გამგებლის მონაწილეობით მიმდინარე აქციის შედეგები განიხილა.როგორც შიხიაშვილმა აღნიშნა, საკრებულოს სარევიზიო კომისიამ საბურთალოსა და კრწანისის რაიონების გამგეობების მიერ თანხების ხარჯვასთან დაკავშირებით გარკვეული დასკვნები წარმოადგინა.
მისი თქმით, კონკრეტულად, საუბარია საბურთალოს რაიონის შემთხვევაში ამხანაგობების თავმჯდომარეების მიერ შექმნილ სათათბიროს წევრებისთვის ერთჯერად ანაზღაურებაზე და კრწანისის რაიონის გამგეობის მიერ სოციალურად დაუცველთა დაფინანსების დოკუმენტაციის დარღვევით შედგენაზე. როგორც შიხიაშვილმა აღნიშნა, საკრებულოს შენობასთან აღნიშნული რაიონების გამგებლების ინიციატივით და ორგანიზებით მოწყობილ აქციაზე კრწანიის რაიონის გამგებელი ხათუნა ბერძენიშვილი, საბურთალოს რაიონის გამგებელი გია ხუროშვილი და ისნის რაიონის გამგებელი თორნიკე ხუციშვილი იმყოფებოდნენ.
საკრებულოს თავმჯდომარის ინფორმაციით, აღნიშნული ქმედებით გამგებლებმა დაარღვიეს კანონის შეკრებებისა და მანიფესტაციების შესახებ, ასევე კანონდარღვევით გამოიყენეს ადმინისტრაციული რესურსი და მოსახლეობასთან განახორციელეს მუქარის სატელეფონო ზარები.
შიხიაშვილმა მიმართა სევდია უგრეხელიძეს, მოკლე ვადაში მიიღოს კანონის შესაბამისი გადაწყვეტილება და თანამდებობიდან გაათავისუფლოს აღნიშნული პირები. თუ მერის მოვალეობის შემსრულებელი ამ მოთხოვნას არ დააკმაყოფილებს, შიხიაშვილი მიიჩნევს, რომ სევდია უგრეხელიძე აღნიშნული გამგებლების საქმიანობის თანამონაწილეა.
შიხიაშვილმა არასამთავრობოებს ის დოკუმენტაცია და ფოტომასალა გადასცა, რომელზეც გუშინდელ აქციაზე მონაწილე პირებია აღბეჭდილი და ამასთან აღნიშნა, რომ დოკუმენტაციის თანახმად, აქციას მხოლოდ სოციალურად დაუცველები არ ესწრებოდნენ.
საკრებულოს თავმჯდომარემ ამ საკითხში არასამთავრობოების მხარდაჭერა ითხოვა.
შეხვედრაზე დამსწრე არასამთავრობო ორგანიზაციების წარმომადგენლების ინიციატივით, აუცილებელია არასამთავრობოებისგან დაკომპლექტებული საბჭოს შექმნა, რომელიც წინასაარჩევნოდ ბიუჯეტის ხარჯვის ნაწილსა და მსგავს კონფლიქტურ სიტუაციებზე აწარმოებს მონიტორინგს. რაც შეეხება გამგებლების თანამდებობებიდან გათავისუფლებას, მიუხედავად არგუმენტირებული ინფორმაციის მიწოდებისა, არასამთავრობო ორგანიზაციის "სიდას'' რეგიონული მენეჯერის ჯუბა მარუაშვილის აზრით, ამ ეტაპზე, წინასაარჩევნოდ მათი გადაყენების დაკმაყოფილება არალეალურია.