21 მარტს, მარნეულში, მუსლიმთა დღესასწაულ „ნოვრუზ ბაირამთან" დაკავშირებით, სახალხო ზეიმი ჩატარდა. ღონისძიებას, პრემიერ-მინისტრ ირაკლი ღარიბაშვილსა და ხელისუფლების სხვა წარმომადგენელთან ერთად, დაესწრო სასჯელაღსრულებისა და პრობაციის მინისტრი სოზარ სუბარი.

საზეიმო ღონისძიებაში აქტიური მონაწილეობა მიიღეს ქვემო ქართლის პრობაციის ბიუროში აღრიცხვაზე მყოფმა პირობით მსჯავრდებულებმა. პრობაციონერებმა საკუთარი შესაძლებლობები წარმოაჩინეს ჭიდაობაში, მკლავჭიდში, ჭადრაკსა და სპორტის სხვა სახეობებში. სახალხო ზეიმის ფარგლებში, ასევე მოეწყო მათი მხატვრული ნამუშევრებისა და ხელნაკეთი ნივთების გამოფენა-გაყიდვა.

ირაკლი ღარიბაშვილმა და სოზარ სუბარმა ინტერესით დაათვალიერეს პირობით მსჯავრდებულთა ექსპოზიცია.

მსგავს ღონისძიებებში ჩართულობა ხელს უწყობს კანონთან კონფლიქტში მყოფი ეთნიკური უმცირესობის წარმომადგენლების რესოციალიზაციას და ადგილობრივ თემებში მათ ინტეგრაციას.