თბილისელთა 75%-ი მიიჩნევს, რომ დედაქალაქში ცუდი ეკოლოგიური მდგომარეობაა. აღნიშნულ მონაცემებს „ეისითი" ავრცელებს, რომელმაც გამოკითხვა თებერვალში ჩაატარა და მთლიანობაში 401 ზრდასრული თბილისელი გამოკითხა.
„ეისითიში" აცხადებენ, რომ ეკოლოგიური მდგომარეობის სასიცოცხლო მნიშვნელობა, მისი პრიორიტეტულობა ხშირად უგულებელყოფილია და მწვანე საფარი ქალაქის განვითარებას და გაფართოვებას ეწირება, ეკოლოგიურად საფრთხის შემცველი მანქანების რიცხვი კი რეგულაციების არარსებობის გამო პერმანენტულად იზრდება.სწორედ ამიტომ „ ეისითიმ" გადაწყვიტა გაერკვია თბილისელთა აზრი იმასთან დაკავშირებით თუ როგორი ეკოლოგიური მდგომარეობაა დედაქალაქში და რამდენად ადექვატურად მიიჩნევენ ისინი პარკების რაოდენობას ან ქალაქის გამწვანების არსებულ ხარისხს.
როგორც კვლევის შედეგად გამოვლინდა, თბილისელთა სამი მეოთხედი (75%) მიიჩნევს, რომ დედაქალაქში ცუდი ეკოლოგიური მდგომარეობაა. მეტიც, 43%-ის აზრით ის ძალიან ცუდ მდგომარეობაშია. თუმცა არსებობენ ისეთი მაცხოვრებლებიც, ვისთვისაც თბილისის ეკოლოგიური მდგომარეობა მისაღებია (19%) ან ვინც მას დადებითად აფასებს (5%).
მეცნიერთა აზრით, გამწვანება აუცილებელია ქალაქის ეკოლოგიური საფრთხეების გასანეიტრალებლად. როგორც აღმოჩნდა, ათიდან სამი თბილისელი (71%) თვლის რომ თბილისში არსებული პარკების და გამწვანებული ტერიტორიების რაოდენობა არ არის საკმარისი. თბილისელთა უფრო მცირე ნაწილი (28%) კი დღეს თბილისში არსებულ გამწვანებულ ხარისხს ადექვატურად მიიჩნევს.
"ეისითი" განმარტავს, რომ განსხვავებული დამოკიდებულება გამოვლინდა მონაცემების ასაკის ჭრილში გაანალიზებისას: ასაკოვანი მოსახლეობა უფრო უკმაყოფილოა ქალაქში არსებული პარკების და გამწვანებული ტერიტორიების რაოდენობით ვიდრე ახალგაზრდები. სავარაუდოდ, ეკოლოგიური მდგომარეობის აქტუალობა ასაკთან ერთად იზრდება.