ნიუ-იორკ ფილარმონიკის არტისტი, ქართველი მევიოლინე, ლიზა ბათიაშვილის უკრაინელ ხალხს სოლიდარობას უცხადებს და რუსეთის ხელისუფლების პოლიტიკისადმი საკუთარ დამოკიდებულებაზე საუბრობს:
„ბოლო 6 წლის განმავლობასში არაერთხელ მიმიღია შეთავაზება, ჩამეტარებინა კონცერტები მოსკოვში. რუსეთის მხრიდან ჩემი ქვეყნის ოკუპაცია 2008 წელს და ის მოქმედებები, რაც დღემდე მიმდინარეობს საოკუპაციო ზოლთან, ჩემში ისეთ პროტესტს იწვევს, რომ ყოველ ჯერზე უყოყმანოდ უარს ვამბობდი. 2012 წელს ლონდონის სიმფონიურმა ორკესტრმა მიიღო მიწვევა როსტროპოვიჩის ფესტივალზე კონცერტის გასამართად, რომელიც მოსკოვში უნდა გაიმართოს 2014-ის აპრილის დასაწყისში. თავის მხრივ ამ ორკესტრმა (მთავარი დირიჟორი ვლადიმირ იუროვსკი) სოლისტად მე დამპატიჟა. დავთანხმდი, მაგრამ, გამოგიტყდებით, შინაგანი ჩუმი განგაშის ფონზე მთელი ამ ხნის განმავლობაში ვებრძოდი საკუთარ თავს, თითქოს რაღაც მიშლიდა ხელს, რაღაც მაკავებდა. და, აი, უკრაინაში განვითარდა მოვლენები - იდენტური სცენარით, იგივე აგრესიით, კაცთმოძულე პოლიტიკით, როგორც ჩემს ქვეყანაში 2008-ში და არა მარტო მაშინ. ბუნებრივია, ამომიტივტივდა ის კადრები, ის არაადამიანური მოქმედებები, რაც ჩემი ხალხის მიმართ განხორციელდა შორეულ და ახლო წარსულში. ამის შემდეგ ჩემთვის ნათელი გახდა, რომ ჩემი რუსეთში ჩასვლა, სცენაზე გამოსვლა და მუზიცირება ჩემს ძალას აღემატებოდა! ორგანიზატორთა რეაქცია ძალიან უარყოფითი იყო, რომლებიც ბოლო ერთი წლის განმავლობაში გაუმჯობესებულ რუსულ-ქართულ ურთიერთობაზე აკეთებდნენ აქცენტს. ერთსაც აღვნიშნავ: საინტერესო დამთხვევაა - ოფიციალური უარი მოსკოვში გამგზავრებაზე და კონცერტის ჩატარებაზე განვაცხადე ყირიმში რუსულ სამხედრო ინტერვენციამდე 1 კვირით ადრე! ლიზა",- აცხადებს ლიზა ბათიაშვილი.
უკრაინელი ხალხის მხარდასაჭერი და რუსეთის ოკუპაციის დასაგმობი განცხადებები, ბოლო დღეების განმავლობაში არაერთმა ქართველმა ხელოვანმა გააკეთა, რომლებიც აცხადებენ, რომ საქართველოს ოკუპაციის და უკრაინის მიმართ კრემლის ძალადობრივი ქმედებების პირობებში ისინი არ აპირებენ რუსეთის საკონცერტო დარბაზებში გამოსვლას.
