თბილისის საკრებულოს ფრაქციის „ქართული ოცნება - თბილისელები" თავმჯდომარემ გულიკო ზუმბაძემ საკრებულოში ბრიფინგი გამართა და „დაუ +" -ს მიერ თბილისის საბავშვო ბაღებისთვის გაწეული მომსახურეობის გაძვირების თაობაზე ისაუბრა.როგორც გულიკო ზუმბაძემ აღნიშნა, თბილისის სკოლამდელი აღზრდის დაწესებულებები ყოველთვის წარმოადგენდა ,,ნაციონალური მოძრაობის" ერთერთ ძირითად დასაყრდენს არჩევნების პერიოდში და როგორც ჩანს, ეს დამოკიდებულება მარტო პარტიული ინტერესით არ შემოიფარგლებოდა და ხშირად კერძო ბიზნეს ინტერესების ხასიათს ატარებდა.
"ამის ნათელი დადასტურებაა თბილისის მერიის საფინანსო სამსახურის ყოფილი უფროსის მიერ სამსახურეობრივი მდგომარეობის გამოყენებით, სპეციალურად, თბილისის საბავშვო ბაღების აუდიტორიული მომსახურეობისათვის შექმნილი კომპანია „დაუ +".
ჩვენთვის ცნობილი გახდა, რომ ხსენებულ კომპანიას დაწყებული აქვს ახალი ხელშეკრულებების გაფორმება ბუღალტრული მომსახურეობისათვის, თითოეულ საბავშვო ბაღთან უკვე 400-400 ლარის გადახდის პირობით, 2019 წლამდე, რაც ჯამში შეადგენს 3 მილიონ 792 ათას ლარს.
ეს ფაქტი გახლავთ კორუფციის კლასიკური ნიმუში! და ამ შემთხვევით სამართალდამცავი ორგანოები უდა დაინტერესდნენ'',- განაცხადა გულიკო ზუმბაძემ და თბილისის საბავშვო ბაღების დირექტორებს ბიუჯეტის თანხების ხარჯვასთან დაკავშირებული ყველა საკითხისადმი პასუხისმგებლობით მოკიდებისკენ მოუწოდა.
"თქვენ სრული უფლება გაქვთ, გარკვეული მომსახურეობის გაწევისათვის, გონივრული პირობების გათვალისწინებით თავად აირჩიოთ ნებისმიერი იურიდიული პირი.აქვე იმასაც ავღნიშნავ, რომ თბილისის საკრებულო სათანადო ყურადღებას ვერ უთმობს სკოლამდელი დაწესებულებების მართვის სააგენტოს საქმიანობას.გუშინ საკრებულოს განათლებისა და კულტურის კომისიის თავმჯდომარეს, რომლის წევრი მეც გახლავართ, წერილობით მივმართე, რომ სააგენტოს ხელმძღვანელობა საკრებულოში ყველა იმ საკითხზე სასაუბროდ მოიწვიოს, რომელიც თბილისის სკოლამდელი აღზრდის დაწესებულებებს უკავშირდება'',-აღნიშნა დეპუტატმა.
საკრებულოში გამართულ პრესკონფერენციას არასამთავრობო ორგანიზაცია ანტიკორუფციული კავშირის ხელმძღვანელიც ესწრებოდა. როგორც გიორგი ბურჯანაძემ განმარტა, კომპანია "დაუ +" 2008 წელს დაარსდა და მას თბილისის მერიის საფინანსო სამსახურის ყოფილი უფროსის დავით ხოსიტაშვილის წარმომადგენელი დავით უთმელიძე ხელმძღვანელობდა. მისივე ინფორმაციით, 2010 წელს, მას შემდეგ, რაც ხოსიტაშვილმა თანამდებობა დატოვა, იგი კომპანიის 100%-იანი წილის მფლობელიგახდა და "დაუ +" საქმიანობა დაიწყო.
"კომპანიის მოვალეობა იყო საბიუჯეტო თანხების იმ ჯიბეებში გადასროლა, რომელნიც გარკვეულწილად რაღაც საქმიანობას აფინანსებდნენ.
გვაქვს შემთხვევები, როცა ხელისუფლებაში მყოფი ადამიანები თავიანთ თანამდებობებს იყენებდნენ სწორედ ასეთი კორუფცული სქემის ჩამოყალიბებისათვის. მსგავსი მიმართულებები იკვეთება ასევე სხვა შემთხვევებში. მაგალითად ბაგა-ბაღების მომარაგებას აწარმოებს ,,ფუდ-სერვისი''. ეს არის გეგენავების ბიზნესი, რომელმაც შექმნა მონოპოლია. ჩვენ შევძელით პატარა ბზარის შეტანა, რაშიც ვგულისხმობ იმას, რომ ფუდ-სერვისის ჩანაცვლებაზე უკვე მუშაობს რამდენიმე შპს. ამით მივიღეთ ის, რომ პროდუქტის ხარისხი გაუმჯობესდა და ფასმა დაიწია. ანალოგიური მექანიზმი ამუშავდება ბაგა - ბაღებში სხვა მომარაგების კუთხითაც და ვთხოვ ბაღის გამგეებს გააქტიურდნენ და წესდებაში მითითებული უფლება - მოვალეობანი შეასრულონ",- განაცხადა გიორგი ბურჯანაძემ.
