„საქართველოს ახალგაზრდა კონსტიტუციონალისტთა ასოციაცია" ეხმაურება „საქართველოს სახელმწიფო აუდიტის სამსახურის" ინიციატივას ადგილობრივი თვითმმართველობის არჩევნების წინ „პოლიტიკური დაფინანსების კანონიერებასა და გამჭვირვალობის მონიტორინგის საკითხებზე მომუშავე დროებითი კომისიის" შექმნასთან დაკავშირებით. როგორც ცნობილია, კომისია დაკომპლექტებული იქნება საქართველოში მოქმედი არასამთავრობო ორგანიზაციების წარმომადგენლებისგან, რაც მისი საქმიანობის მაქსიმალურ გამჭვირვალობასა და საკითხთა შეფასების ობიექტურობას უზრუნველყოფს.
„საქართველოს ახალგაზრდა კონსტიტუციონალისტთა ასოციაცია" დაფუძნების დღიდან აქტიურადაა ჩართული ქვეყანაში მიმდინარე საარჩევნო-სამართლებრივ პროცესებში. ასოციაციის წევრები აქტიურად აკვირდებოდნენ წინასაარჩევნო და საარჩევნო პროცესებს 2012 წლის საპარლამენტო და 2013 წლის საპრეზიდენტო არჩევნებზე. ორგანიზაციის წარმომადგენლები ესწრებოდნენ 2014 წლის 25 თებერვალს სახელმწიფო აუდიტის სამსახურში კომისიის შექმნასთან დაკავშირებულ პირველ სამუშაო შეხვედრას. "მსგავსი კომისიის შექმნა და მისი წევრების არასამთავრობო სექტორის წარმომადგენლებით დაკომპლექტება მოსალოდნელი არჩევნების წინ პოზიტიურ გავლენას იქონიებს საქართველოში ჯანსაღი და კონკურენტუნარიანი წინასაარჩევნო გარემოს ჩამოყამოყალიბებაზე. ეს ყოველივე კი საქართველოს თითოეული მოქალაქის ინტერესებში უნდა შედიოდეს." - აცხადებენ ასოციაციაში.
ასოციაცია იმედოვნებს, რომ სხვა არასამთავრობო ორგანიზაციებთან ერთად, მიეცემა საშუალება კომისიაში საქმიანობის და თავის წვლილს შეიტანს მონიტორინგის პროცესში.
„საქართველოს ახალგაზრდა კონსტიტუციონალისთა ასოციაციამ" აუდიტის სამსახურს უკვე მიაწოდა რეკომენდაციების 5 პუნქტიანი პაკეტი „პოლიტიკური დაფინანსების კანონიერებასა და გამჭვირვალობაზე მონიტორინგის საკითხებზე მომუშავე დროებითი კომისიის". დებულებასთან დაკავშირებით. როგორც ორგანიზაციაში აცხადებენ, აღნიშნული რეკომენდაციების გათვალისწინება კომისიის საქმიანობას კიდევ უფრო ეფექტურს გახდის.