სილეზიის რეგიონის სამთავრობო დელეგაციის აჭარაში ვიზიტი დასრულდა. როგორც აჭარის ჯანდაცვის სამინისტროში განმარტავენ, დელეგაციის წევრებმა ვიზიტი დღეს აჭარის მთავრობის თავმჯდომარესთან შეაჯამეს. შეხვედრას არჩილ ხაბაძესთან ერთად აჭარის ჯანმრთელობისა და სოციალური დაცვის მინიტრი ნუგზარ სურმანიძე, განათლების, კულტურისა და სპორტის მინისტრი გიორგი თავამაიშვილი და ტურიზმისა და კურორტების დეპარტამენტის თავმჯდომარე დემურ დიასამიძე ესწრებოდნენ.
შეხვედრაზე მხარეებმა მიმოიხილეს ერთი წლის წინ პოლონეთში გამართულ შეხვედრაზე დაგეგმილი საკითხების შესრულების შედეგები, გაცვალეს ინფორმაციები არსებული თანამშრომლობის შესახებ და განიხილეს 2014 წლის სამუშაო პროგრამა.
გადაწყდა, რომ მიმდინარე წელს პოლონეთში აჭარიდან ონკოლოგიისა და რევმატოლოგიის მიმართულების ექიმებისა და მედდებისათვის განხორციელება ტრენინგებისა და სტაჟირების პროგრამა.
შეხვედრის დასრულების შემდეგ დელეგაციის წევრებმა ნუგზარ სურმანიძესთან ერთად შშმ პირთა დღის ცენტრი მოინახულეს. პოლონური მხარე მზად არის განხორციელოს შშმ ბავშვთა გაცვლითი პროგრამა.
სილეზიის რეგიონსა და აჭარის ავტონომიურ რესპუბლიკას შორის ჯანდაცვის სფეროში თანამშრომლობა 2011 წელს დაიწყო. 2011-2013 წწ პოლონეთში სილეზიის გულის დაავადებათა ცენტრ „ზაბრზეში" აჭარის სამედიცინო დაწესებულებებიდან სტაჟირების კურსი გაიარა შვიდმა ექიმმა და ერთმა მედდამ, 2013 წელს პოლონეთის ონკოლოგიურ ცენტრში გაცნობითი ხასიათის ვიზიტით იმყოფებოდა აჭარის ონკოლოგიური საავადმყოფოს დირექტორი.
სილეზიის რეგიონის სამთავრობო დელეგაციას ვიცე-მარშალი მარიუშ კლეშევსკი ხელმძღვანელობდა, 6 კაციანი ჯგუფი ბათუმს გუშინ ეწვია.
