ვანკუვერში, საციგაო ტრასის, რომელზეც ქართველი სპორტსმენი დაიმტვრა, კორექტირება მოხდა.
"ეს კიდევ ერთი დადასტურებაა იმისა, რომ ტრასა აქამდე იყო ზედმეტად საშიში", - აცხადებს საქართველოს კულტურის, ძეგლთა დაცვისა და სპორტის მინისტრი ნიკა რურუა.
მისივე განმარტებით, სპორტის ამ სახეობის ფედერაციის მითითებით ტრასა შემოკლდა, იმ მოსახვევში კი, საიდანაც ქართველი სპორტსმენი ნოდარ ქუმარიტაშვილი გადმოვარდა, სპეციალური დამცავი კედელი აშენდა.
რურუას განმარტებით, მომხდარ ტრაგედიაზე გამოძიება უკვე მიმდინარეობს და ქართული მხარე ყველაფერს გააკეთებს, რათა შემთხვევის ზუსტი მიზეზი დადგინდეს.
ჯერჯერობით უცნობია როდის გადმოასვენებენ ნოდარ ქუმარიტაშვილს საქართველოში.
