ფრაქცია "ძლიერი საქართველო" დაშლილია, შესაბამისად საპარლამენტო უმცირესობაც.
როგორც ჟურნალისტებს ფრაქცია "ერთობა სამართლიანობის" თავმჯდომარემ დიმიტრი ლორთქიფანიძემ განუმარტა, მისმა ფრაქციამ დღეს ოფიციალურად მიმართა პარლამენტის საორგანიზაციო დეპარტამენტს იმ დოკუმენტების გამოსათხოვად, რომელიც დაადასტურებდა 13 თებერვლის პლენარულ სხდომაზე საპროცედურო საკითხთა საპარლამენტო კომიტეტის თავმჯდომარე ხათუნა გოგორიშვილის განცხადების პარლამენტის რეგლამენტთან შესაბამისობას.
გოგორიშვილმა 13 თებერვალს პარლამენტს აცნობა ოპოზიციურ ფარქციებში და უმრავლესობაში მომხდარი გადანაცვლებების შესახებ, რის შედეგად პარლამენტში საპარლამენტო უმცირესობა შენარჩუნებული იქნა.
ლორთქიფანიძის თქმით, კანცელარიაში გატარებულია კობა კურდღელაშვილისა და რომან მარსაგიშვილის წერილობითი განცხადებები ერთი ფრაქციიდან გამოსვლასა და მეორეში გადასვლის შესახებ. რაც შეეხება უმცირესობის წევრის რატი მაისურაძის განცხადებას, რომელიც ფრაქცია "ქრისტიან-დემოკრატებიდან" "ძლიერ საქართველოში" გადავიდა, გია თორთლაძის სახელზე განცხადება ჩაბარებული არა აქვს.
შესაბამისად, რეგლამენტის 89 პრიმა მუხლის თანახმად, მხოლოდ ფრაქცია "ძლიერი საქართველოს" თავმჯდომარის გია თორთლაძის ბიუროსთვის მიმართვა რატი მასურაძის მის ფრაქციაში გადასვლასთან დაკავშირებით საკმარისი არ არის.
პარლამენტის რეგლამეტის 89 პრიმა მუხლის თანახმად კი, ფრაქციაში გაწევრიანების მსურველი პარლამენტის წევრი წერილობითი განცხადებით მიმართავს ფრაქციის თავმჯდომარეს. ფრაქცია პარლამენტის წევრის განცხადებას განიხილავს ფრაქციის წესდებით დადგენილი წესით და იღებს შესაბამის გადაწყვეტილებას. ფრაქციაში ახალი წევრის მიღების შესახებ ფრაქციის თავმჯდომარე 3 დღის ვადაში წერილობით ატყობინებს საპროცედურო საკითხთა და წესების კომიტეტს და პარლამენტის აპარატის საორგანიზაციო დეპარტამენტს.
მათი თქმით, აღნიშნული ფაქტობრივი მასალით მტკიცდება, რომ პარლამენტის რეგლამენტის მოთხოვნა დარღვეულია, რატი მაისურაძე დამოუკიდებელი დეპუტატია, ხოლო საპარლამენტო უმცირესობა - დაშლილი.
პარლამენტის რეგლამენტის მიხედვით, საპარლამენტო უმცირესობას ქმნის ფრაქციები. თუ ფრაქცია "ძლიერი საქართველო" დაშლილად გამოცხადდება იმ არგუმენტით, რომ დეპუტატ რატი მაისურაძეს ფრაქციაში გაწევრიანებასთან დაკავშირებით განცხადება არა აქვს დაწერილი, საპარლამენტო უმცირესობაც დაშლილად ჩაითვლება.
