"ნაციონალურმა მოძრაობამ" 20-ლარიანი ვაუჩერების დარიგებით წინასაარჩევნო კამპანიის დროს, ცდილობს მოირგოს ხალხზე მზრუნველის მანტია. ამის შესახებ დღეს გამართულ ბრიფინგზე "დემოკრატიული მოძრაობის" წერვმა თამარ ცინცაბაძემ განაცხადა.
"ნაცვლად იმისა, რომ საბიუჯეტო რესურსები მიმართულ იქნას მიზნობრივად და მხოლოდ იმ მომხმარებელთა დასახმარებლად, რომლებიც რეალურად საჭიროებენ ასეთი სახის დახმარებას, ხელისუფლებამ გადაწყვიტა ელექტროენერგიის 20-ლარიანი ვაუჩერით "დახმარებოდა" ყველა ოჯახს; მათ შორის ისეთ ოჯახებს, რომლის წევრების შემოსავალიც რამდენიმე ათეულჯერ და მეტად აღემატება საარსებო მინიმუმს.
"ნაციონალური მოძრაობისათვის" უკვე ტრადიციად იქცა წინასაარჩევნო კამპანიის დროს, მოირგოს ხალხზე მზრუნველის მანტია და ამ როლის შესრულებისთვის გამოიყენოს, ისედაც უკიდურესად მძიმე მდგომარეობაში მყოფი ჩვენი ქვეყნის მოსახლეობის ჯიბიდან ამოღებული თანხები", - განაცხადა ცინცაბაძემ.
მისი თქმით, მმართველი გუნდი, საკუთარი წინასაარჩევნო კამპანიისთვის უკანონოდ, მუდმივად იყენებს საბიუჯეტო სახსრებს.
"ქვეყნის დღევანდელი მმართველი გუნდი, საკუთარი წინასაარჩევნო კამპანიისთვის უკანონოდ,მუდმივად იყენებს საბიუჯეტო სახსრებს. 20-ლარიანი ვაუჩერების დარიგება ამომრჩევლის მოსყიდვაა და არა საკუთარი მოქალაქეების სოციალური პრობლემების მოგვარება. ეს რომ ასე იყოს, თუნდაც ეს გაუაზრებელი პროექტი რამდენიმე თვის წინ უნდა ჩატარებულიყო და არა ახლა, როცა ზამთარი პრაქტიკულად გავიდა, ყინვების პიკმა გადაიარა და სოციალურად დაუცველ მოსახლეობაში, სამწუხაროდ, უკვე გვყავს ყინვით დაზარალებულები და ყინვისგან დაღუპულები", - განაცხადა ცინცაბაძემ.
