სირიის სამთავრობო არმიამ გაეროს გენერალური ასამბლეის მიერ მიღებული რეზოლუციის მიუხედავად სირიის ქალაქ ჰომსის კიდევ უფრო მწვავე საარტილერიო დაცხრილვა განაახლა.ინფორმაციას ამის შესახებ უფლებათადამცველები ავრცელებენ.
ოპოზიციის წარმომადგენლების ერთ ერთი ჯგუფი კი აცხადებს, რომ ახლანდელი დაცხრილვა ყველაზე მძიმეა სირიის სამთავრობო ჯარების მიერ ბოლო 13 დღის განმავლობაში ქალაქზე განხორციელებულ შეტევათაგან.
ამავდროულად სირიაში ჩინეთის წარმომადგენელი ჩავიდა პრეზიდენტ ბაშარ ასადთან მოლაპარაკებების გასამართად. სწორედ ჩინეთი და რუსეთი იყო იმ 12 ქვეყანას შორის, რომლებმაც გაეროს გენერალურ ასამბლეაზე სირიის შესახებ რეზოლუციას ხმა არ მისცა. ორი კვირით ადრე კი სწორედ ამ ორმა ქვეყანამ ვეტო დაადო გაეროს უშიშროების საბჭოს რეზოლუციას.
"ქალაქ ჰომსის დაბომბვა არ წყდება. ისინი იყენებენ ნაღმმტყორცნებსა და რაკეტებს, რომლებიც მშვიდობიანი მოსახლეობის საცხოვრებელ სახლებს ეცემა. ქალაქს უზარმაზარი ზიანი აქვს მიყენებული - იგი იზოლაციაშია. არავინ ჩვენ არ გვეხმარება. ჩვენ არ გვაქვს საკვები და მედიკამენტები. პრეზიდენტის ძალები ქალაქი მაცხოვრებლებს საცხოვრებელი ადგილების დატოვების საშულებას არ აძლევენ", _ აცხადებს "ბი-ბი-სის" -თან საუბარში ადგილობრივი მოსახლე.
ამავე დროს აღსანიშნავია, რომ გაეროს გენერალურმა ასამბლეამ სირიის მაცხოვრებლებს მიღებული რეზოლუციით მკაფიო სიგნალი გაუგზავნა - მსოფლიო თქვენს მხარეზეა. ეს განცხადება გაეროში აშშ-ს მუდმივმა ელჩმა სიუზან რაისმა გააკეთა.
სირიის რევოლუციის გენერალური კომიტეტის წარმომადგენელი ხადი აბდულა "ფრანს პრესისათვის" მიცემულ ინტერვიუში აცხადებს, რომ სირიაში "გაუგონარი ძალადობა ხორციელდება". მისი თქმით, დაბომბვა იმდენად ინტენსიურია, რომ ქალაქში წუთში ოთხი რაკეტა ფეთქდება.
"ათასობით ადამიანი ჰომსშია ბლოკირებულია. იქ არის რაიონები რომელთა შესახებაც ამ დრომდე ცნობილი არაფერია", _ აცხადებს აბდულა.
სირიის სამთავრობო ძალები ქალაქის ირგვლივ არიან დაბანაკებულნი და სახმელეთო ოპერაციის განსახორციელებლად ემზადებიან. მათ ქალაქში წინააღმდეგობა უნდა ჩაკლან.
ლონდონის უფლებების დამცველი ორგანიზაცია "Syrian Observatory for Human Rights" კი იუწყება, რომ ამ დილით ჰომსში 9 ადამიანის ცხედარი იპოვეს, რომლებიც ჯერ ამოცნობილი არ არის. მათივე ინფორმაციით, სამთავრობო ძალებმა ქალაქზე საჰაერო იერიში მაშინ მიიტანეს, როდესაც მაცხოვრებლები ლოცვისათვის გარეთ იყვნენ გამოსულები და ქალაქის ქუჩები სავსე იყო.
შეგახსნებთ, რომ გუშინ გაეროს გენერალურმა ასამბლეამ კენჭი უყარა რეზოლუციას სირიის საკითხზე, რომელშიც ბაშარ ასადის მთავრობას მოუწოდებს შეწყვიტოს ძალადობა.
რეზოლუციას მხარი დაუჭირა გაეროს წევრმა 137-მა ქვეყანამ, წინააღმდეგ ხმა მისცა 12-მა, თავი შეიკავა 17-მა. გაეროს უშიშროების საბჭოს ორმა მუდმივა წევრმა, რუსეთმა და ჩინეთმა კვლავინდებურად უმრავლესობისგან განსხვავებული პოზიცია დააფიქსირეს. ორივე ქვეყანამ რეზოლუციის წინააღმდეგ მისცა ხმა.
გაეროში რუსეთის წარმომადგენელმა ვიტალი ჩურკინმა აღნიშნა, რომ რეზოლუცია ბაშარ ასადის ხელისუფლების იზოლაციას ემსახურება და ქვეყანაში ვითარებას უფრო დაძაბავს.
აღსანიშნავია, რომ მიმდინარე წლის 4 თებერვალს რუსეთმა და ჩინეთმა სირიის საკითხზე გაეროს უშიშროების საბჭოს რეზოლუციის პროექტი მეორედ დაბლოკეს. გაეროში რუსეთის წარმომადგენლის ვიტალი ჩურკინის განცხადებით, რეზოლუციის პროექტი არ ასახავდა სირიაში არსებულ რეალიებს.
"კენჭისყრაზე გამოტანილი რეზოლუციის პროექტი არაადეკვატურად ასახავდა სირიაში არსებულ რეალიებს და სირიის მხარეებს არადაბალასებულ სიგნალებს უგზავნიდა,"- განაცხადა კენჭისყრის შემდეგ ჩურკინმა.
რეზოულციას პირველად ვეტო იმავე ქვეყნებმა 2011 წლის ოქტომბერში დაადეს.
ვეტო, რომელიც რუსეთმა და ჩინეთმა სირიის საკითხზე გაერო-ს უშიშროების საბჭოს რეზოლუციას დაადეს, ბაშარ ასადის ხელისუფლებას შესაძლებლობას აძლევს გააგრძელოს ომი საკუთარი ხალხის წინააღმდეგ. ამის შესახებ გაერო-ს გენერალურმა მდივანმა პან გი მუნმა განაცხადა.
თავის სიტყვაში, გენერალურმა მდივანმა დასვა კითხვა: „კიდევ რამდენი ადამიანი უნდა დაიღუპოს, ვიდრე სირია შეწყვეტს სამოქალაქო ომისკენ სვლას?".
AP PHOTO
