საქართველოს საგარეო საქმეთა სამინისტრო ცხინვალის რეგიონში მდებარე მე-4 სამხედრო ბაზაზე ე.წ. ოსური ბატალიონის შექმნას ეხმაურება და განცხადებას ავრცელებს.
განცხადების მიხედვით, გავრცელდა ცნობა იმის შესახებ, რომ ოკუპირებულ ცხინვალის რეგიონში განთავსებულ რუსეთის საოკუპაციო ჯარის ე.წ. მე-4 სამხედრო ბაზაზე შეიქმნება ე.წ. „ოსური ბატალიონი". ცნობის თანახმად ე.წ. „ოსური ბატალიონში" მიიღებენ ოკუპირებულ რეგიონში მაცხოვრებლებს და მათ ექნებათ რუსეთის არმიაში კონტრაქტით მომსახურე პირების თანაზომადი ფულადი ანაზღაურება".
"საქართველოს საგარეო საქმეთა სამინისტრომ არაერთხელ გაამახვილა საერთაშორისო თანამეგობრობის ყურადღება იმ ფაქტებზე, რომ რუსეთის ფედერაცია აგრძელებს საქართველოს ოკუპირებული რეგიონების მილიტარიზაციას, შეჰყავს უახლესი შეტევითი შეიარაღება და განაგრძობს სამხედრო ინფრასტრუქტურის მშენებლობას. ფაქტობრივად საქართველოს ოკუპირებული ტერიტორიები გადაქცეულია დიდ სამხედრო ბაზად, ხოლო იქ ჯერ კიდევ შემორჩენილი მოსახლეობა ან ემსახურება რუსეთის სამხედრო ბაზას ან მსახურობს რუსეთის საოკუპაციო ძალებში, რის მაგალითსაც წარმოადგენს ზემოხსენებული ე.წ. „ოსური ბატალიონის" შექმნა", _ ნათქვამია საგარეო უწყების მიერ გავრცელებულ განცხადებაში და იქვე აღნიშნულია, რომ რუსეთის საოკუპაციო ძალების გაძლიერებისათვის საჭირო დამატებითი ფინანსური და მატერიალური საშუალებების გამოყოფა ხდება იმ ფონზე, როცა თითქმის ყოველდღიურად ვრცელდება ცნობები მთელი რუსეთის მასშტაბით სამხედრო, მათ შორის ბირთვულ, ობიექტებზე სხვადასხვა ტიპის ავარიების შესახებ, რაც რეალურ საფრთხეს უქმნის პირველ რიგში რუსეთის მოსახლეობას, აგრეთვე მეზობელ ქვეყნებსა და მთლიანად მსოფლიოს.
