"დემოკრატიული მოძრაობის" სათათბიროს წევრ მამუკა აჩბას განცხადებით, ხელისუფლებამ დევნილებს შეღავათები მოუხსნა. როგორც აჩბამ დღეს გამართულ ბრიფინგზე განაცხადა, 22-ლარიანი დახმარების მქონე დევნილებს უთიშავენ ელექტროენერგიას და მხოლოდ შემდგომ ატყობინებენ, რომ მათ მოხსნილი აქვთ შეღავათები.
"გასაკვირი ის არის, რომ დაკანონებულ თუ დაუკანონებელ ფართებში კომპაქტურად ჩასახლებული დევნილები იღებდნენ სულზე 100-კილოვატიან შეღავათს, რომლის ეკონომიასაც აკეთებდნენ ზაფხულის განმავლობაში და შემდგომ ზამთარში იყენებდნენ - ახლა კი ისინი შეღავათების მოხსნის გამო მოუმზადებელნი აღმოჩნდნენ გაუსაძლისი კლიმატური პირობების წინაშე", - განაცხადა აჩბამ.
მისი თქმით, "დემოკრატიული მოძრაობა" კატეგორიულად მოითხოვს, სასწრაფოდ აღუდგეს დევნილებს ყველა წართმეული შეღავათი, თუნდაც ზაფხულის პერიოდის დადგომამდე და შეწყდეს დევნილი მოსახლეობის გაუფრთხილებლად მსგავსი აქტების განხორციელება.
"ყოველივე ეს ხდება იმ ქვეყანაში, სადაც მილიონები იხარჯება კონცერტებზე, მათ შორის, იმ კონცერტზე, რომელიც აგვისტოს ომის წლისთავზე იმართება, იმ ომის, რომელმაც კიდევ დიდი ხნით დაუკარგა ამ ადამიანებს საკუთარ სახლებში ღირსეულად დაბრუნების შესაძლებლობა", - აღნიშნა აჩბამ.
