ბიძინა ივანიშვილი იმ პოლიტიკურ ფიგურებს ასახელებს, რომლებთანაც თანამშრომლობაზე მიმდინარეობს მოლაპარაკებები. როგორც ივანიშვილმა დღეს გამართულ პრესკონფერენციაზე განაცხადა, თანამშრომლობის შესახებ მოლაპარაკებები მიმდინარეობს გუგული მაღრაძესთან, რომელთანაც პრინციპული შეთანხმებები მიღწეულია. ასევე თანამშრომლობაზე მიდის მოლაპარაკება სალომე ზურაბიშვილთან. როგორც ივანიშვილმა განაცხადა, ზურაბიშვილი მასთან სათანამშრომლოდ მზადაა, თუმცა გარკვეული დეტალებია დასაზუსტებელი.
"ხვალ ან ზეგ მექნება შეხვედრა გუგული მაღრაძესთან. მაღრაძესთან თანამშრომლობაზე პრინციპული შეთანხმებები მიღწეულია. მე მას ვთავაზობ მთლიანად გაერთიანებას ჩემს მომავალ პარტიაში. ასეთივე მოლაპარაკებები მაქვს სალომე ზურაბიშვილთან. სალომე ზურაბიშვილი თანამშრომლობისთვის მზადაა", - აღნიშნა ივანიშვილმა.
მისი თქმით, მოჟირატარული წესით არჩევნებთან დაკავშირებით თანამშრომლობისთვის მზადაა "სოციალ-დემოკრატებთან".
"ასეთივე რანგში განვიხილავთ თანამშრომლობას "მწვანეების პარტიასთან". თუ ჩვენ მოვახერხებთ თანამშრომლობას და ეს ძალები კანდიდატს წამოაყენებენ კონკრეტულ რეგიონში, რომელიც მისაღები იქნება ჩვენთვის, ჩვენ შეგვიძლია მათ მხარი დავუჭიროთ და საერთო კანდიდატზე ვიზრუნოთ ერთად", - აღნიშნა ივანიშვილმა.
